Oden Issittumut aallaqqiinnaqaaq

Ilisimatuut 80-it nunanit assigiinngitsunit 14-ineersut pingaartumik Stockholmip Universititetianeersut, Göteborgip Universitetianeersut kiisalu Ruslandimi USA-milu universitetineersut angalaqataasussaapput.

Angalaneq Swerus-C3-mik taaguuteqartinneqartoq silap pissusiata allanngoriartornerata ilisimatusarfigineqarneranut attuumassuteqarpoq.

Issittumi metangassimik aniatitsinerujussuup suminngaanneernera, gassillu taassuma imaaneersup nunarsuup seqernup qinngornerinut ulorianartunut illersuutaanut - ozonimut - qanoq sukkatigisumik nungukkiartortitsinera ilisimatuut paasisaqarfigerusuppaat. Gassit nunarsuup silaannaanik kissakkiartortitsisartut marsarsunnit issulinnit, qeriuaannartup masarsuinit imaatalu naqqanit gassinit pinngortitameersunit pisarnissaa ilimagineqartut ilagaat.

- Imaata naqqa qerisoq maanna aakkiartulersimavoq. Taamaammat sunarpiaq pissutaanersoq metangassimillu aniasoqartarnerata siunissami qanoq ikkumaarneranik siulittuisinnaanissarput paasissallugu uatsinnut pingaaruteqarpoq, ilisimatuut pisortaat Örjan Gustafsson Ritzaumut oqarpoq.

Oden maannakkorpiaq Norgep avannaani Tromsømiippoq. Juulip ulluisa arfernganni Sibiriap kangiata avataani issittup imartaanut aallassaaq ukiuni 100-ni ilisimasassarsiortoqassalluni ilaatigullu aamma Alaskami Barrowiliartoqassalluni.

Sikusiut Oden siornatigut aamma nunatsinniissimavoq, Danmarkip nunattalu Qalasersuup pigisaani imaata naqqanik piginnittussaanerannik uppernarsaatissanik katersuisoqarnerani nunavissuup imaani avammut ikkannertaanik misissuinermi 2012-mi atorneqarluni.