Issittup imartaanik nakkutilliineq suleqatigiissutigileraat
Taama isumaqatigiissusiortoqarneratigut oqallittarfimmik nutaamik aamma pilersitsisoqarpoq, Arctic Coast Guard Forum pilersinneqarluni. Issittup imartaani suleqatigiinnerulertoqarlunilu ataqatigiissakkamik nakkutiginnittoqarnissaa anguniagaavoq. USA-p sinerissamik nakkutilliisoqarfiata tusagassiuutinut nalunaarutaani taama ilaatigut allaaserisaqartoqarpoq.
Sinerissamik nakkutilliisut pisortatiguunngikkaluartumik taamaasillutik attaveqaqatigiittarfeqalerput.
Issittup imartaani annerusumik nakkutiginnittoqalernissaanik siunnerfeqarneq Issittumi Siunnersuisoqatigiit kissaateqarneratigut pilersinneqarpoq, Issittup imartaani isumannaallisaaniarnerup nukittorsarneqarnissaa, Issittullu imartaata ataqatigiissaakkamik aqutsiffiunissaa pingaarnertut anguniagaalluni.
Immami angallannermi ajutoortoqarsimatillugu upalungaarsimaniarneq, sikunik aserorterineq suleqatigiinnerlu aamma eqqartorneqassallutik. Canadamim naalakkersuisut Canadami tv-qarfissuarmut CBC-mut taama nalunaaruteqarput.
Nunat Issittup imartaanut sineriallit USA-mi nunap immikkoortuani Connecticutimi ataatsimiipput.
Danmarkimi illersornissaqarfiup Issittup imartaata ataqatigiissakkamik nakkutigineqarnerulernissaanik Kunngeqarfik Danmark sinnerlugu isumaginnittussaanera Radioaviisip paasissutissaataasa takutippaat.