Aasianni Ilinniarnertuunngorniarfik pisortartaarpoq
Namminersorlutik Oqartussat tusagassiuutinut nalunaarumminni nalunaarput rektorinngortoq tassaasoq Otto Simonsen.
Inuiaqatigiilerinermut oqaluttuarisaanermullu cand. mag.-isoq 58-nik ukioqarpoq.
Aalborgip Universitetiata immikkoortuisa ilaanni Det Sanfundsvidenskabelige Fakultet-imi allaffeqarfimmi pisortatut atorfini qimallugu Otto Simonsen Aasiannukassaaq.
Aamma atuaruk Aasianni ilinniarnertuunngortut nasartaartut nuannaaqisut
Ilinniartitsinermi pisortatut misilittagalipilussuuvoq, soorlu Danmarkimi Ilinniartitaanermut ministereqarfimmi isumaqatigiinniarnermut immikkoortumi allaffimmi pisortaasimavoq, Nordjyllands Amtimi inuusuttunik inersimasunillu ilinniartitsinermi aqutsisuunermini aamma gymnasiat akisussaaffigisimavai.
Otto Simonsen Løgstørimi inunngorsimasoq nulianilu pingasunik meeraqarput.
Atorfimmut toqqagaanini nuannaarutigaa tanngassimaarutigalugulu, sulilernissaminullu qilanaarluni.
- Namminersorlutik Oqartussat ilinniartitaanermi anguniagaannut sunniuteqaqataanissara qilanaaraara, minnerunngitsumillu ilinniarnertuunngorniarfiup sulisorpassuisa suleqatiginissaat qilanaareqaara, taakkoqanngippammi anguniakkanik angusisoqarsinnaanngitsoq Otto Simonsen oqarpoq.