Ulloq unnuarlu paaqqinnittarfinnut inissiisarneq sukateriffigineqalerpoq

Meeqqat inuusuttullu sumiginnarneqartut angerlarsimaffimmiiginnarnissaannut ilaqutariinnullu qanigisanut inissinneqartarnissaannut suliniutit annertusarneqassapput.

Taakkuupput meqqanut inusuttunullu inatsisissap nutaap ullumi saqqummiunneqartumi qitiutinneqartut.
Meeqqanut inatsisissap nutaap siunertaraa pingaartumik meeqqat inuusuttullu sumiginnarneqartut illersorneqarnisaat tapersersorneqarnissallu.

Taakkununnga ilaavoq angajoqaanngortussat immikkut ikiorneqarnissaminnut pisariaqartitsisut, taama oqaluttuarpoq inatsisissamik suliniuteqartoq  Ilaqutariinnermut, Naligiissitaanermut, Isumaginninnermut Inatsisinillu Atuutsitsinermut Naalakkersuisoq  Martha Lund Olsen

- Aalajangersakkami ilanngunneqassaaq meeqqamik ernumanartorsiortumik nalunaaruteqartoqarpat akunnerit 24-it ingerlaneranni iliuuseqartoqassasoq, nalilersuisoqassaaq qanoq una pisoqassasoq aamma ullut 14-it ingerlaneranni iliuuseqartoqarnissaa inatsimmi aamma allassimassaaq, Martha Lund Olsen oqarpoq.

Meeqqanut inatsisissami qitiutinneqarpoq ulloq unnuarlu paaqqinnittarfimmut  ullumikkut inissiisarneq nalinginnaasutut atorneqartup nalilersorneqarnissaa. Meeqqat inuuusuttullu angerlarsimaffiup avataanut inissinneqartarnerisa pinaveersaartineqarnissaat annertunerusumik iliuuseqarfigineqarniarpoq.

Qanigisanut inissiisinnaaneq

Pinaveersaartitsinerit arlaqartut saniatigut pisortat ilaqutariinnut paaqqinnittunut tapiissuteqarnerup saniatigut meeqqat angerlarsimaffiup avataanut  inissinnagit qanigisanut inissiisinnaaneq suliniutigineqassaaq tamanna isumaginninnermut oqartussaasut akuerippassuk  

-  Ilaquttanut qanigisanut soorlu ajakkunnut akkakkunnut allanullu inissiisoqarsinnaanera pisinnaanera upperaarput Martha Lund olsen oqarpoq.

Aningaasarpassuit pisortani sipaarneqarsinnaapput.

Ulloq unnuarlu paaqqinnittarfinnut inissiisarneq meeqqamut ataatsimut en million kr-nik akeqarpoq pinaveersaartitsineq  sunniuteqarluartoq akikinnerujussuulluni,  naalakkersersuisut aningaasaqarnikkut ingerlatsineq pillugu nalunaarusiaani ippassaq saqqummiunneqartumi atuarneqarsinnaavoq.

Meeqqanut inatsisissaq kommunit meeqqanut sullissinerannik pitsanngoriaataassaaq tamannami pisariaqartinneqarmat.

-   Meeqqanut inuusuttunullu kommuneni sullissinerit ukiuni kingullerni kinguaattoorutaasarsimasut ilisimavarput,  taamaattumik kissaatigineqarpoq ersarinnerusumik ilitsersuerpalaarnerusumik inatsiseqarnissaaq,  Ilaqutariinnermut, Naligiissitaanermut, Isumaginninnermut Inatsisinillu Atuutsitsinermut Naalakkersuisoq  Martha Lund Olsen