ASSIT Nuussuarmi aallaasersortoq politiit tigusaraat
Nutartigaq nal. 14:06: Nuussuarmi aallaasersortoqarneranut atatillugu nalunaarut allaasersornerunani qummoroortartuugunartoq, Politiit tusagassiutinut nalunaaruteqarlutik allapput. Ullaaq pisumut atatillugu tigusarinnittoqarsimanngitsoq, politiit sisamanngornermi ualikkut ualikkut paasissutissiipput.
Suliamut tunngatillugu nutaarsiassaq kingulleq uani atuaruk:
AAMMA ATUARUK Aallaasersortoqanngitsoq tigusarinnittoqanngitsorlu
Nuussuarmi aallaarpaluk nalunaarutigineqartoq, qummoroortartuusinnaasoq politiit tusagassiutinut nalunaaruteqarput. Angut tigusarineqartoq pillugu allanik paasissutissanik KNR pissarsiniarsarivoq.
Nuup ilaani Nuussuarmi Qaarsunnguami inuk ataaseq tigusarineqarpoq. Angut tigusarineqartoq ullaap tungaani nalunaaqutaq arfineq-pingasut missaani arlaleriarluni seqqorsimasutut pasineqarpoq.
Unnerluussisut pisortaat Michael Bo Hansen KNR-imut taama ilisimatitsivoq. Politiit immikkut sungiusakkat Qaarsunnguami inissiaqarfimmut iserternerisa kingorna tigusarinnittoqarnerani politiit tigusarineqartorlu ajoqusersimanngitsut aamma oqaatigaa.
Politiit nalunaaqutaq arfineq-pingasut qaangilaaraali sumiiffimmiipput aqquserngillu arlallit assersorpaat. Nalunaaqutarlu 10.30-p missaani politiit immikkut sungiusakkat inissiaqarfimmut iserterput, taannali ullaap tungaani aallaasersortuunersoq ilisimaneqanngikkallarpoq.
KNR-ip ilanngutassiortuata pisoqarfimmi najuuttup takunnittut arlallit oqaloqatigisimavai, taakkulu angummik aallaasilisartumik ullaaq takusimallutik oqaluttuarput.
