Kim Kielsen isumaqarpoq, februaarimi aajangertoqartoq, ilinniarfiit sisamat nuunneqasasut.Assi: KNR

Nuussuinissamik pilersaarut Naalakkersuisuni paatsiveerusimaarutigeqigaat

Ilinniarfinnik Nuummiit illo1qarfinnut allanut nuussisoqarnissaanik aalajangiisoqarsimanersoq, Inuit Ataqatigiit Siumullu isumaqatigiinngissutigeqaat.

Naalakkersuisut Ilinniarfiit sisamat Nuummiit allanut nuunniarlugit aalajangersimapput.

Imaluunniit qanoq?

 

Naalakkersuisut pilersaarutaat paatsiveerusimaarutaasut, partiit siuttui ippassaq oqallimmata paasinarsivoq.

Aalajangiisoqareersoq, Naalakkersuisut siulittaasuata Siumumeersup, Kim Kielsen, erseqqissarpaa. Naalakkersuisuneeqataatali, Inuit Ataqatigiit siulittaasuata Sara Olsvigip, tamanna isumaqatiginngilaa.

Kingunerususat misissorpaat

Ilinniarfinnik sisamanik nuussisinnaaneq taamaalioraannilu suna kingunerusinnaanersoq Naalakkersuisut misissoraat, taassuma qineqqusaarneq naggaserlugu ippassaq oqallinnerup qaallunaatoortaani erseqqissarpaa.

 

- Siumup siulittaasua, aammami Naalakkersuisunut siulittaasuusoq, naqqilaarusuppara, kalaallisut aallakaatitsinermi oqarmat, ilinniarfiit sisamat pillugit aalajangiisimasugut. Naalakkersuisuni taama iliunngilagut, ilinniarfinnilli sisamanik nuusseratarnerup kingunerisassai misissorpagut, Inuit Ataqatigiit siulittaasuat Sara Olsvig oqarpoq.

Februaarimi aalajangerneqarpoq

Taamali oqarnera naalakkersuisuneeqataata, taamatullu siulittaasuata, Kim Kielsenip akuerisinnaanngilaa.

 

- Siullermik Inuit Ataqatigiit siulittaasuata oqaasii naqqilaarusuppakka. Febuaarip qaammataani aalajangertoqarpoq. Ilinniarfiit sisamat nuunneqassapput, Kim Kielsen oqarpoq.

 

Naak februaarimi aalajangiisoqarsimaneraraluaraa, ilinniartitaarnermut naalakkersuisoq, Doris Jakobsen Qanoruumi marsi naalersoq oqarpoq, sumilluunniit aalajanersaasoqanngitsoq, nuussuinissarlu ilinniarfiit pitsaassusaannik kalluaassanersoq misissuisoqassasoq. Tamaammat Kim Kielsen aalajangiisimallutik oqarnera kukkusuusoq, Sara Olsvig isumaqarpoq. 

 

- Ilimagaara Siumup siulittaasuata oqaluuserisaa tassaasoq, apeqqut una Naalakkersuinikkut Ataqatigiissaarisoqatigiinni ataatsimiinnermi oqaluuserisimallugu. Nalakkersuisuni isumaqatigeeqqissaarpugut, tusagassiutinullu nalunaaruteqarpugut kiisalu ilinniartitaanermut naalakkersuisoq kommuninullu naalakkersuisoq tusagassiutinut oqareerlutik, nuussuinerit pissagunik ilinniarfinnik ajornerulersitsissanngitsut misissussagipput, Sara Olsvig qallunaatut oqallinnermi oqarpoq erseqqissarluguli, suliffeqarfinnik nunap ilaani allanut inisinneqarsinnaanerannut ammalluni.

 

Nuussuinissamik pilersaarut 

  1. NI-Nuuk Qaqortumi Campus Kujallermut ilaalersillugu nuunneqassaaq.
  2. Tech Collegep saviminilerinermut immikkoortortaa Sisimiunut nuunneqassaaq.
  3. Eqqumiitsuliornermik Ilinniarfik Aasiannut nuunneqassaaq.
  4. Isumaginninnermi siunnersortiunngorniartut ilinniarfiat Ilisimatusarfimmiit Ilulissani SPS-imut nuunneqassaaq. 

Tusarfiit: Naalakkersuisut

 

 

AAMMA ATUARUK Partiit siuttuisa naggataarutaasumik oqallitsinneqarnerat takoqqiguk

 

 

Isummersuutit

Inatsisartut Upernaakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!