SUNGIUSARNEQ Nuup eqqaani umiarsuit marluk aportuusaartinneqassapput

- Hjemmeværniminngaanniit inuit hunnorujut ajunaartuusaarlutik piviusuusaartitsisuussapput, saniatigullu aamma hunnorujut maani nunatsinneersut peqataassapput, tassalu katillugit 200-t, umiarsuarni admirali Torben Mikkelsen KNR-imut oqarpoq.

LIVEX 2016 upalunngaarsimanissamik sungiusarnerit nunatsinni pisut maannamut annersaraat, tassalu putsup ussikkannerani umiarsuit marluk apornerat. Umiarsuit aappaat Færingehavnimik taaguutilik erngartupilussuuvoq, immakkiartorpoq, ajunaalernermilu kalerrisaaraluni. Umiarsuaq kivilermat umiarsuarmi aquttup inuttat annanniutinut ikeqquai, inuttalli ilaat 15-it annanniutilerlutik imaanut pissiinnartariaqarput.

Upalungaarsimanissat misiligarneqarput

Annaassiniarnermi, ikuallattoqarnerani avatanngiisinillu mingutsitsinaveersaarinermik upalungaarsimanissaq misiligarneqarpoq

Umiarsuup aappaa, Gute, apornermi ajoquserpoq, Aasiaallu Radioatigut ikiortissarsiorluni. Umiarsuarli kivilinngilaq, umiarsuullu aappaata Nuummut ingerlannginnermini inuttat tallimat annattut umiarsuarmut ikitippaat. Ajornartorsiutilli assigiinngitsut pilerput, soorlu inuit ajoqusingaatsiarsimasut, inuit mattussaaqqasut ikuallattoqarneralu, tamakkulu sungiusarnerup ingerlanerani isumaginiarneqassapput.

- Taamaammat pissutsit tamakku tamarmik ataatsimoorluta sungiusarluta aqqusaassavagut, tamannalu pingaarnermik ikuallattoqarnerani avatanngiisinillu mingutsitsinaveersaajutigaluni annaassiniarnermut tunngasuuvoq.

- Sungiusarnermilu peqataasut pingaarnerit tassaapput Kalaallit Nunaanni upalungaarsimanermik suliaqartartut, Torben Mikkelsen oqarpoq.

Upalungaarsimanissamik sungiusarnermi inuit 350-it missaat Kalaallit upalungaarsimasut, Nunatsinni Politiit, Issittumi Sakkutooqarfik, danskit Illersornissaqarfiat kiisalu Hjemmeværnet, sungiusarnermi KNR-ip aamma peqataaffigisaani peqataapput