Sermersooq: Nuup avataani sulisunut immikkut ajunngitsorsiassat
Ukiumut ataasiarluni akeqanngitsumik angalaneq, sulinerup nalaani eqaarsaarneq Nuummullu ukiumut ataasiarluni paasisassarsiorluni angalaneq, tassaapput Kommuneqarfik Sermersuumi aningaasaqarnermut ataatsimiititaliap sulisorisami ilaannut, ilaatigut isumaginninnermi siunnersortinut, tarnip pissusaanik ilisimasalinnut peqqissaasunullu ajunngitsorsiassatut tunniukkusutai.
Taamatut ajunngitsorsiassaqartitsinikkut Nuup avataani atorfinitsitsiniarneq ajornannginnerulersinniarneqarpoq.
- Paamiuni, Tasiilami Ittoqqortoormiinilu inunnik isumaginninnermi suliaqartunik ilinniarluarsimasunillu atorfinitsinniartarnerit taamatullu sulisooreersut tigummiinnarsinnaaneri unammillernartuusoq ilisimavarput, borgmester Asii Chemnitz Narup (IA) tusagassiorfinnut nalunaarummi taama oqarpoq.
Atugassarititaasunut pitsanngorsaatissat sulisooreersunut aamma atuutsinneqassapput. Aaqqissuussineq ukiuni pingasuni atuutissaaq 2017-illu naanerani nalilersuiffigineqassalluni.
Pitsanngorsaatissat tassaapput:
• Sulisunik ataasiakkaanik qaammammut ataasiarluni ilitsersuisarneq + qaammat ataaseq allorlugu sulisunik tamanik ilitsersuisarneq + tassanngaannaq ajutoornermik nalaanneqarnermi immikkut ittumik ilitsersuisarneq
• Ukiumut ataasiarluni akeqanngitsumik angalatitsisarneq
• Sapaatip akunneranut ataasiarluni sulisut tamarmik nalunaaquttap akunnerani ataatsimi eqaarsaatinneqartarnerat imaluunniit sapaatip akunneri tamaasa CSR-imut nalunaaquttap akunnerani ataatsimi peqataaneq
• Ukiumut ataasiarluni Nuummut paasisassarsiorneq, pisariaqartinneqarpallu Danmarkimi kommunit ilaanni suleqatinik suliamut tunngasunik paarlaasseqatigiinneq imaluunniit sullivinnik paarlaateqatigiinneq
• Killissaleriikkamik atorfinitsitsinermik neqerooruteqarneq (ajornanngippat aningaasanik ukiumut ataasiarluni tigusartagassnik neqerooruteqarluni).
