Nuup angallaviginissaa ajornannginnerulersinniaraat
- Ilusilersueriaatsip nutaap, allagartallu nutaat paasissutissiisapput, aqqutissiuillutik illoqarfittullu pingaarnertut nittarsaatissalluta. Ullumikkut allagartalioriaaseqanngilagut aaqqissuusamik, naammaginartumik paasissutissiisumik tamannalu Nuummiittunut tamanut naammaginanngilaq illoqarfittullu pingaarnertut. Kissaatigaarput nuannersumik Nuuk, illoqarfiullu immikkoortui pingasut nittarsaanissaat, Mille Søvndahl Pedersen tusagassiuutinut nalunaarummi oqarpoq.
Isumassarsiaq nutaaq ukiup tulliani Arctic Winter Gamesertoqarnerani siullermik misilinneqassaaq.
Artic Winter Games sioqqullugu, ingerlanerani kingornalu immikkuullarissunik allagartalersuinerit illoqarfiup assiliartaanut ilanngunneqassapput, taamaasillutik inuit tamarmik ataasiakkaallu timersornikkut pisoqarfinni timersorfinnukarsinnaaniassammata.
Allagartat siulliit septembarimi oktobarimiluunniit ikkussorneqarnissaat naatsorsuutigineqarput.
