Nuummiuaqqat ikiarornartumik paasititsiniaavigineqassapput
Nuup Kommunia atuarfinni tamani 7. klassinut sammitinneqartumik sapaatip akunneranik sivisussuseqartumik imigassaq ikiaroornartorlu pillugit februaarip aallaqqaataa aallarnerfigalugu sammisaqartitsissaaq. Siunertarineqarpoq aanngajaarniutit qanoq kinguneqartarneri pillugit 7 klassit ilinniartinneqarnissaat.
Pinerluttarnerup pinaveersimatinnissaa siunertaralugu kommunemiit, atuarfinniit politiiniillu suliassaq suleqatigiissutigineqarpoq. Atuarfinni aalajangersimasumik sapaatip akunnerani sammisaqartitsinermi periarfissaq iluatsillugu taamaaliortoqalersoq Nuup Kommuniani pitsaaliuinermut siunnersorti Line Dalentoft ilisimatitsivoq.
Siornatigut atornerluisimasuusut saqqummiussaqarnissaminnut periarfissaqassapput, aamma pinerluuteqarsimasut inissiisarfiannut pulaartoqarsinnaavoq imaluunniit klassit akulerillutik suleqatigiissillugit, Line Dalentoft oqarpoq. Sammineqartoq pillugu ilinniartitsisut angajoqqaanik ilisimatitsereerlutillu aamma ataatsimiititsiumaarput.
