Nuummioq Roskilde Festivalimi hashinik arsaagaasoq

Angut Nuummioq 24-nik ukiulik Danmarkimi Roskilde Festivalimi hashimik tuniniaanissaq isumassarsiatsialaasorisimagunaraluarpaa. 

Iluatsippallaarsimanngilarli. Tassami hashimik 90 grammimik tuniniagassaminik arsaagaasimasoq Ritzau allaaserisaqarpoq. 

Hashi tuniniagassatut aggorneqarsimasoq politiit oqaatigaat. Angut 24-nik ukiulik hashimik tuniniaaniartutut politiit unnerluutigisimavaat. 

Ulluni marlunni pinerlunnerit arlaqartut

Roskilde Festivalimi ullut siulliit marluk politiinut suliassaqartitsilaavissorput. Inuit arlallit ikiaroornartunik arsaagaasimapput. 

Suliat ikiaroornartunut tunngasut saniatigut pinngitsaaliisutut unnerluutiginnittoqarsimasoq Ritzau allappoq. 

Arnap 18-inik ukiullip angutit marluk, 18-inik 19-inillu ukiullit, pinngitsaaliisutut unnerluutigisimavai. Angutit pineqartut politiinit tigusaasimapput iperagaareersimallutillu. 

Aamma festivalimi ujajaasoqarsimasoq Ritzau allappoq. Angut 19-inik ukiulik persuttarneqarsimavoq oqarasuaammillu angallattakkamik tilliffigineqarsimalluni. 

Ujajaasoq suli kinaassusersineqanngilaq.