"Nuummioq"-mik suliarinnittup unnerluutigineqarnera taamaatiinnarneqartoq
Mikisoq Lynge tusagassiorfinnut nalunaaruteqarluni taama ilisimatitsivoq.
Ilitsersuisut taakku marluk filmiliaminnik, kalaallinit suliarineqartut siullersarisaannik, iluatsitsilluarput, peqatigiillutillu filmiliornermik suliffeqarfik "3900 Pictures ApS" pilersippaat.
AAMMA ATUARUK Nuummiumik pilersitsisoq: Ilassaaleqisimaqaanga
Filmi "Nuummioq" Nunatsinni inuussutissarsiornermut aningaasaateqarfinnit taamanilu Namminersornerullutik Oqartussanit aningaasalersugaavoq. "Nuummioq"-lli takuteqqaarnerata kingorna suliffeqarfik millioninik akiitsoqarluni akiliisinnaajunnaarpoq filmiliornermilu suleqataasut akissarsitinneqanngitsoorlutik.
AAMMA ATUARUK 3900 Pictures akiliisinnaajunnaarpoq
Suliffeqarfimmik piginnittup aappaata Otto Rosingip, Mikisoq Lynge peqquserluuteqarsimasutut unnerluutigalugu politiinut suliassanngortippaa.
Suliap inerneqarnera oqiliallaatigaa
Suliarlu misissuiffigineqareerluni maanna inerneqarpoq, Nuummilu politiit naliliipput Mikisoq Lyngep pinerluttulerinermik inatsimmik unioqqutitsisimasutut eqqartuussivimmut suliassanngortinneqarnissaanut uppernarsaatissat naammanngitsut.
Mikisoq Lynge tusagassiorfinnut nalunaaruteqarluni ima allappoq:
- Suliap ukiuni sisamani qasunaqisumik ingerlanneqareerluni kiisami inerneqarnera oqiliallaatigeqaara.
