Nuummi TELE-POST-imi tillinniartoqartoq
Tillinniat kikkuusimagaluarnersut oqarasuaatinik angallattakkanik amerlasuunik tillinniarsimapput, iPhonesit, Samsungit Huaweillu amerlasuut tillinneqarsimallutik, atortullu elektroniskiusut allat aamma tillinneqarsimallutik.
Innuttaasut tillinniartoqarsimaneranik ilisimannissinnaasut politiinut attaveqaqquneqarput, tillinniarnermut paasissutissaataasinnaasut, tillinniarsimasulli kikkuusinnaanerinik ilisimannittut politiinut attaveqaqquneqarlutik. Tillitaasimasinnaasunik tuniniaasoqarsimaneranik ilisimannittoqarpat aamma saaffiginnittoqarsinnaavoq.
Nuummi politiit oqarasuaataasa normoraat 70 14 48.
Oqarasuaatinik angallattakkanik akikitsunik atortunilluunniit elektroniskiusunik allanik neqeroortoqarpat pisisoqannginnissaa politiit kajumissaarutigaat, neqeroortoqarpat pisinermut allagartaq, tassa kvitteringi piumaneqassasoq oqaatigalugu, pisisimanermulluunniit takussutaasinnaasumik allamik piumasaqarnissaq kajumissaarutigineqarluni.
Tillitanik pisineq pinerluuteqarnertut nalilerneqartartoq politiit aamma eqqaasitsissutigaat.
