Nuummi Nuussuarmi inissiaq ikuallammat angut 23-nik ukiulik ajunaarpoq
Angut alla - aamma 23-nik ukiulik - putsumit ipisaanngutitaanini uutitersimaninilu pissutigalugit Dronning Ingridip Napparsimmavissuanut unitsinneqarluni.
Tamatuma peqatigisaanik Paarnat 14-imi inissiap ikuallattup eqqaani inissiani najugallit arlallit putsumit ipisaanngutitaasimanertik pissutigalugu nakkutigisassatut unitsinneqarlutik.
Politiit qatserisartullu nalunaaqutaq 9.43 kalerrinneqarput, pilertortumillu takkukkaluartut inissiaq ikuallalersoq tamakkerluni ikuallappoq, inissianilu arlalinni najugallit putsup erngullu ajoqusiinerisigut qimagussorneqarlutik. Taakku qasserpiaanersut suli oqaatigineqanngilaq. Politiilli ilisimatitsissutigaat inissiaatileqatigiiffik INI qimagussorneqartut inissikkallarneqarnissaat pillugu ilisimatinneqareersoq, inissiigallarsimasorlu.
Radioaviisimit paasisavut naapertorlugit, najugaqartut arlallit akunnittarfimmi inissinneqarallarsimapput.
Ikuallannermut pissutaasoq suli ilisimaneqanngilaq, politiilli oqaatigaat ikuallanneq misissoqqissaarneqaleruttortoq, ikuallattunillu misissueqqissaartartunik aggersaasoqareersoq soorlu aamma angutip 23-nik ukiullip toqqutigisaanik misissuisussamik nakorsamik toqusunik misissueqqissaartartumik tikisitsisoqarniartoq.
Misissueqqissaarnermut atatillugu politiit tamanut ikioqqullutik saaffiginnipput. Inuit ikuallannermut atatillugu paasissutissiisinnaasut Nuummi politiinut oqarasuaatikkut 70 14 48-mut, tassa 70 14 48-mut saaffiginneqquneqarput
