VIDEO Nuummi Inuit pinnguaataannik unammersuaartoqarpoq

Inuit indianerillu pinnguaataanni pissartanngorniunnerit Nuummi ingerlanneqarput. Inuit indianerillu pinnguaataannik sakkortuumik pissanganartumillu pissartanngorniuunnerit ingerlalluarput.
Allattoq Bikki P. Kleist
marsip 13-at 2015 19:02

Peqataasut 60-it missaanniipput, illoqarfiit pingasuneersut nunaqarfillu ataaseq. Tassaasut Upernavik, Uummannaq, Qaarsut aamma Nuuk.

- Unamminertai ajunngitsumik piffissaq eqqoqattaarlugu ajornartorsiutitaqanngitsumillu tassa massakkut ingerlaarujorput, Inooraq Brandt Arctic Sportimi GM-ernermik aaqqissuusseqataasoq KNR-imut oqarpoq.

Nunatsinni siorna pissartanngorniuttoqanngimmat massakkut marsimi pissartanngorniuttoqarpoq, Nuummilu ukioq manna novembarimi aamma pissartanngorniuuttoqalerpat Arctic Winter Gameseqarnissaanut anngunniuunnersuaqassaaq.

Sinerissamiillu peqataasut sungiusarluarsimapput.

- Assut nuannarigatsigu una aaqqissuussineq Arctic Winter Gamesimut piareersaatitut atoratsigu. Pingaartumik angutitagut ingerlalluartorujussuusarput nukersornerni arnartagut aamma peqataalluartarput, Inooraq Brandt oqarpoq.

Pissartanngorniuunnerit ataasinngornermiit tallimanngorneq ilanngullugu ingerlanneqarput.