Nuummi ikuallattoqarnerani inuk ataaseq ajunaartoq
Nuummi politiit ippassaq ataasinngornermi maajip 18-iani unnuap-qeqqalerani Inspektørbakkenimi inissiani uiguleriiaani ikuallattoqarneranik innuttaasumit kalerrinneqarput. Inissianut ilaapput utoqqarnut inissiat arlariit.
Qatserisartut aggersarneqarput qatserinerlu aallartinneqarluni.
Ikuallattoqarneranut atatillugu inuk toqungasoq ikuallaffiusumi nassaarineqarpoq, aammattaaq ikuallaffiusup qanittuani najugallit qulit, politiit marluk portørilu ataaseq putsumik iioraasimanermut misissorniarlugit napparsimmaviliaanneqarlutik, politiit taama ilisimatitsipput.
Nuup Politiivini pigaartut pisortaata Bjørn Bjerregaardip KNR-imut uppernarsarpaa ikuallattoqarnerani inuk ataaseq ajunaarsimasoq.
- Ikuallaffiusunik misissuisartut misissuinertik ullaaq manna nalunaaqutaq arfineq-pingasunut aallartissavaat, ikuallannermut suna pissutaasimanersoq misissorneqassalluni. Inuk toqungasoq inissiami nassaaraarput, politiit pigaartuisa pisortaat Bjørn Bjerregaard oqarpoq, ajunaartullu kinaassusaa aammalu qassinik ukioqarnersoq ullaaq manna oqaatigisinnaanngikkallarpaa.
Ikuallannermut suna pissutaasoq suli paasineqanngikkallarpoq.
