VIDEO Nuummi GU-mut aallaasersornissamik sioorasaarisoqarnera pissutigalugu politiit qimagussortitsisut
Ilinniartut ilaata atuarfimmut sioorasaarinerata ilungersunartutut nalilerneqarsimanera pissutigalugu Ilinniarnertuunngorniarfimmit qimagussortitsisoqarnissaanik politiit naliliisimapput.
- Nuummi Politiit sioorasaarummik apuussivigineqarsimapput, sioorasaarinerillu politiit ilungersunartutut nalilersimavaat. Taamaammat politiit aalajangerput GU-mit qimagussortitsisoqassasoq.
- GU-mi inunnik ajoqusertoqarsimannginnera erseqqissaatigineqassaaq. Sioorasaarisoqarsimanera pineqarpoq GU-milu pisortat politiillu tamanna qisuariarfigaat, Nuummi Politiit tusagassiorfinnut nalunaaruteqarlutik taama allapput.
Ilinniartut ilaat angerlartinneqarsimapput
Ilinniartut kulturikkut illorsuarmut Katuamut qimagussortinneqarsimanerat politiit ilisimatitsissutigaat, politiillu aamma tassani najuupput.
- Ilinniartut ilaasa siusinnerusukkut angerlartinneqarsimanerannik paasitinneqarpugut. Taamaammat meeqqat, inuusuttut sulisullu ilinniarnertuunngorniarfimmit qimagussortinneqarsimanngisut kisiisa pineqarput.
- Ilinniarnertuunngorniarfimmi taassumalu eqqaani inunnik ajoqusertoqarsimannginnera politiit erseqqissaatigeqqissavaat, politiit tusagassiorfinnut nalunaaruteqarlutik taama allapput.
Politiit innersuussutaat malinneqassapput
Nuummi ilinniarnertuunngorniarfimmit qimagussortitsinermut atatillugu politiit kaammattuutigaat inuit sumiiffimmiittut politiit innersuussinerat maleqqullugit.
Ilinniarnertuunngorniarfimmut sioorasaarisup kinaassusia paasiniarlugu politiit maanna misissuileruttorput. Tassungalu atatillugu innuttaasunut aamma peqquneqarput politiit ataqqeqqullugu politiillu innersuussutaat maleqqullugit.