Nuummi eqqakkanik ikuallaavik annertuumik nutarteriffigineqartoq
Eqqakkanik ikuallaavik 1989-imi pilersinneqarpoq kingornalu annerusumik nutarteriffigineqarsimanani.
Nutarnerisoqarneratigut ikuallaaneq pitsanngorsarneqarlunilu naammassisaqarsinnaassuseq 10 procentinik annertusarneqassaaq. Naatsumik oqaatigalugu, eqqakkanik ikuallaavik nutaaliaalluinnartunngortinneqassaaq eqqakkanillu ikuallaasarnermi teknologii nutaajunerpaasoq atorneqalissalluni, Kommuneqarfik Sermersooq tusagassiorfinnut nalunaaruteqarluni taama allappoq.
- Eqqagassalerinerup piujuaannartitsinissamik tunngaveqartumik ingerlanneqarnissaa pingaartitatta ilagaat. Kommunimi sulisut eqqagassalerinermut tunngatillugu pikkorissigaluttuinnarnerat nuannaajallannartuuvoq. Eqqagassalerinerup tungaatigut pitsanngoriaatit annertuut arlaqartut ukiuni kingullerni pisimapput, tamatumalu malitsigisaanik eqqakkanik ikuallaavik tamakkiinerusumik atorluarneqarnerulerpoq, Kommuneqarfik Sermersuumi Sanaartornermut Avatangiisinullu ataatsimiititami siulittaasoq, Mille Søvndahl Pedersen, taama oqarpoq.
Nuummi eqqakkat nalunaaquttap akunneranut 1,6 tonsiusarput
Eqqakkanik ikuallaavimmi sulineq ingerlaannarpoq, ikuallaavimmi nutarterinerup nalaani ingerlasinnaanngikkaluartoq Nuummi eqqagassaqartuaannarpoq.
Innuttaasut nalunaaquttap-akunneranut katillugit 1,6 tonsinik eqqaasarput, ullormut 40 tonsit anguneqartarlutik. Taakkulu ullut tamaasa eqqakkanik ikuallaavimmi ikuallanneqartarput. Eqqakkalli maannakkorpiaq ikuallanneqarsinnaanngimmata naqiterlugit plastikfoliemik poortorlugit uninngatinneqarput, ikuallaavik nutarterneqareerluni piareerpat ikuallanneqartussanngorlugit.
Maannamullu eqqakkat poortukkat angisuut 1600-t ikuallagassanngorlugit piareersarneqareerput. Eqqagassat uninngatinneqartut tipiliorsinnaassapput, tamannali navianartortaraqaranilu peqqissutsimut sutigulluunniit akornutaanavianngilaq, eqqakkanik ikuallaavimmi ingerlatsinermi pisortaq taama ilisimatitsivoq.
