Nuummi atuartut nunat tamalaat ilisimatusarluni suliniutaannut toqqagaasut
Meeqqat allat, ilaatigut Chilemeersut, Brasiliameersut Malayasiameersullu suleqatigalugit namminneq nunarsuullu sinnerani avatangiisit pillugit ajornartorsiutinut aaqqiissutissanik tigussaasunik meeqqat ilisimasaqalernissaat piginnaasaqalernissaallu suliniummi anguniagaavoq.
Tassungalu atatillugu neriuutigineqarpoq 9.a-mi atuartut avatangiisit pitsaanerusut pillugit meeqqat ataatsimeersuartinnissaannut Malaysiami pisussamut peqataajartorsinnaajumaartut.
Ataatsimeersuarnermut peqataanermik saniatigut, meeqqat orpippassuit siallersartut aamma takornarniassavaat ilisimatuunillu Københavnip uumasuusivissuaneersunit ulluni sisamani ilinniartinneqassallutik. Atuartut nunarsuarmi pissutsit pillugit ilisimasaqarnerulersimallutik allanngueqataarusussusermillu pigisaqalersimallutik angerlarnissaat neriuutigineqarpoq.
Piviusulersaarusiussapput
Meeqqat angalanerminni misigisatik filmiliarissavaat, atuarfinnilu allani ilinniartitsissutitut atorneqarsinnaasumik meeqqanut inuusuttuaqqanullu piviusulersaarusiorlutik. KNR filmip takutinnissaanut soqutiginnilluni aamma nalunaareersimavoq.
Atuarfik Hans Lyngemi 9.a-mi atuartut angalanissamut aningaasat pisariaqartinneqartut kingulliit pissarsiarinissaannik maanna sulissuteqarput. Tassungalu atatillugu allagartanik eqqorniagassanik (lodseddelinik) sapaatit-akunnerini kingullerni marlussunni tuniniaapput, borgmester Asii Chemnitz Narupilu ajugaasumik ullumi ullaap tungaani nalunaaqutaq 10.15 makitsissaaq.