Nuuk Nordisk aallartiinnaqaaq
Aaqqissuussaq nunani avannarlerni eqqumiitsuliortut ataatsimoorfissaqartikkumallugit aallartinneqarsimasoq, ataqatigiissaarisoq Pipaluk Lind oqarpoq.
- Nunani avannarlerni eqqumiitsuliortut naapillutik pinnguarfiannik ilisarititsinissaq siunertaraarput. Nunat avannarlernik oqaruma soorunami Kalaallit Nunaat ilaavoq, nunanummi avannarlernut ilaammat, Pipaluk Lind KNR-imut oqarpoq.
AAMMA ATUARUK Nunat Avannarliit Nuummi 2017-imi Kulturisioqatigiinnissaannut siuttuusussat toqqarneqartut
Kulturisioqatigiinneq Nuuk Nordisk 2015-imi perngaammik aaqqissuunneqarpoq. Tassani eqqumiitsuliortut 140-t sinnerlugit peqataapput, ukioq mannalu 200-init ikinnerunngitsut peqataassallutik. Ilaatigut tusarnaartitsinerit, isiginnaartitsinerit, eqqumiitsulianik saqqummersitsinerit isiginnaagassianillu takutitsinerit ulluni arfinilinni Nuummi takuniarneqarsinnaassapput.
Aaqqissuussamilu taama annertutigisumi nunani avannarlerni eqqumiitsuliortut ataatsimoorfissaqarnissaat siunertaavoq.
- Nunani avannarlermiut naapeqatigiittarfissaannik Kalaallit Nunaanniittumik amigaateqarsimavugut. Kalaallit nunaat Nunanut avannarlernut qaninnerulersikkusukkatsigu, taava isumassarseriataarpugut "Avannaa Nuummukaakkutsigu ajornannginnerussaaq"
Taamaasiornerli ajornaatsuinnaasimanngilaq.
- Peqataasussat Nuummukarnissaasa nerisaqartinnissaassalu aaqqissuunniarnerat taavalu aamma allaqqinnissaat unammillernartuusimavoq.
AAMMA ATUARUK 200 kunstnere kommer til stor festival i Nuuk til efteråret
Aaqqissuussinerlu immikkuullarimmat peqataasoqarluarnissaa ataqatigiissaarisup neriuutigaa.
- Ilumut tamanut misigisassaqarpoq. Taamaammat aaqqissuussatsinnut alakkaasoqarluarumaartoq neriuutigeqaarput. nuannersuinnarnik misigisassaqarpoq, Pipaluk Lind oqarpoq.
Nuuk Nordisk oktobarip 16-anit 21-at ilanngullugu ingerlanneqassaaq.