Nuuk eqqissinerup illoqarfissuatut toqqarneqartoq
Eqqissineq pillugu arpannerup, Sri Chinmoy-Oneness-Home-Peace Runip, sapaatit-akunneranni uani Nuummi ingerlanneqarnerani toqqaaneq pivoq, ilaatigut Nuummi atuarfinnut arlalinnut, nunarsuarmi eqqissinissaq pillugu oqariartuuteqarlutik pulaartoqarsimalluni.
Ilaatigut Reykjavik, Stockholm, Oslo aamma Ottawa peqatigalugit Nuuk maanna 'Eqqissinerup illoqqarfissuatut' toqqarneqarpoq.
Eqqissineq pillugu arpannermik aaqqissuisut, Inatsisartunut ilaasortat sisamanngornermi naapippaat, taakkunanngalu ilaasortanit 15-init eqqissinerup naneruaa tigummivaat, ilaatigut Inatsisartut siulittaasuata Lars-Emil Johansenip naneruaq tigummisimallugu.
Kommuneqarfik Sermersuuttaaq borgmesteria, Asii Chemnitz Narup, immikkut ittumik nersorniarneqarpoq.
Taanna inuiaqatigiinni sulissutigisimanini pillugit Torch Bearer Awardimik nersorneqarpoq.
Siornatigut taama nersorneqarsimasut ilagaat sydafrikamiut ærkebiskopiat Desmond Tutu, 100 meterinut arpalluni sukkaniuuttartoq Carl Lewis aamma Islandip præsidenterisimasaa Vigdís Finnbogadóttir
Eqqissineq pillugu, ilaqutariinni tamanit peqataaffigineqarsinnaasumik, arfininngorpat oktobarip aallaqqaataani arpattoqassaaq.
Katuap saavani arfininngorpat ataatsimut tamanna aallartissaaq.