Politikki Inuussutissarsiutit

Nuttarnerit politikikkut aalajangiisarnermit pissuteqarput

Nalinginnaasuunngilaq nunaqarfinniit illoqarfinnut anginerusunut nuuttarneq. Ukiunili kingullerni tamanna atuuppoq politikkikkut aalajangiisarnerit pissutigalugit. Illoqarfiillu aningerit politikkikkut aalajangiisoqartillugu salliunneqartartut, paasisimasallit marluk oqarput.

Allattoq Anton Gundersen Lihn

oktobarip 19-at 2016 07:42

Nutserisoq Jaaku Lyberth

Taama oqarput nunaqarfiit ineriariartorneri pillugit immikkut ilisimasaqartut marluk.
Nuna tamakkerlugu pilersaarusiaq 2016mi innuttaasut nunaqarfinnit illoqarfinnilu mikinerusunit ukiuni tulliuttuni nuunnissaat atuarneqarsinnaavoq.

Inuit allamut nuuttariaqarnerannut tunngavilersuutigineqartut amerlasinnaapput, Ilisimatusarfimmilu inuiaqatigiit pillugit ilisimatuup Birger Poppelip oqarnera naapertorlugu inuit nutsertariaqarnerannut pissutaavoq politikkikkut ingerlatsisimaneq.

Aamma atuaruk pinngitsaaliissummik-matoqqaanissaq-tusarniaanermi-akissuteqarfigineqanngilaq

- Kalaallit Nunaanni ineriartorneq aqqusaagarput, polikikkut aalajanngiisoqarnikkut pilersinneqarpoq pinngortitap avatangiisillu allanngoriartorneranit patsiseqarani, Birger Poppel oqarpoq.

- Sumiiffinni inoqarfiulluartuni aningaasaliisoqarnissaq salliutinneqartarpoq tamannalu polikikkut atorluarneqarluni, Kåre Hendriksen Danmarks tekniske Universitet-mi issitumi teknologi pillugu lektori taama oqarpoq.

- Inuussutissarsiutitigut ineriartortitsinissamut periarfissaqarnerusut salliutinneqarneq ajornerat ullumikkut ajornartorsiutaavoq, annerusumilli qinersisartut sumiinnerat pingaarnerutinneqarluni, Kåre Hendriksen oqarpoq.

- Tassalu ineriartortinneqarnissaannut ilimanaateqartut salliutinneqarneq ajorput, Kåre Hendriksen oqarpoq.

- Tassalu illoqarfinni anginerusuni aningaasaliinissat salliutinneqartarput naak sumiiffinni allani aningaasaligaanni iluanaaruteqartoqarsinnaagaluartoq Kåre Hendriksen oqarpoq.

Kåre Hendriksen aamma isumaqarpoq, najugaqarfinnik pilersitsisoqarsinnaalluartoq inuussutissarsiuteqarnissamut piukkunaatilinni assersuutitullu taavai aalisarfiusinnaasut imaluunniit aatsitassarsiorfiusinnaasut, tamakkuali misissorluarneqaqqaassasut taanna oqarpoq.