Arajutsivigit? Nutaarsiassat sapaatip akunnerani pingaarnerit

Sapaatit akunnerisa pingajuanni oqaluttuat annertuut annikitsullu saqqummersinneqarpoq. Tasiilamili Reykjavikkimilu pisut malunnarnerpaapput.

Sapaatip akunnerata aallartinnera Tunumit nuanniitsunik nutaarsissaqarpoq tassami inuit marluk imminut toqupput sapaatillu akunnera qaangiutinngitsoq alla ataaseq toqunneqarluni.

Tamakku pisut alianartut pillugit Sermersuup borgmesteria, Asii Chemnitz Narup tarnip pissusianut ilisimasalinnik tarnillu nappaataanut nakorsat peqatigalugit innuttaasut illoqarfimmilu sullissisut tapersersoriartorlugit ataasinngormat Tasiilaliarpoq. Pisut alianartut Tasiilami innuttaasut 2000-iusut sunnersimavai tamannalu pillugu innuttaasut ikumatitalisarlutik ataasinngormat ingerlaaqatigiipput. Itinerusumik uani atuagaqarit.

Ataasinngormalli aamma nutaarsiassatsiaqarpoq. Naatsorsueqqissaarnerimmi qimerloorneranni aningaasaqarnerni naatsorsuinerit arlallit siuariarsimasut takutinneqarpoq. Avammut tunisaqarneq siuariartorpoq suliffissaaleqisullu amerlassusaat 2016-imi ikileriarsimapput.

Nunallu aningaasaqarneraniinnitsinni, aningaasaqarnermut aatsitassanullu naalakkersuusimasoq, Randi Vestergaard Evaldsen, ullumikkut Demokraatini siulittaasuusoq Inatsisartunilu ilaasortaasoq marlunngormat nutaarsiassaateqarpoq. Tassalu kommunimut qinersinermi aprilip sisamanaani ukioq manna Kommuneqarfik Sermersuumi qinersivissani takuneqarsinnaassalluni oqaluttuaraa.

Nunanut allanut saariarutta, Reykjavikkimi ilungersunartumik pisoqarnera nutaarsiassaqartitsivinni marlunngormalli sammineqanngaatsialerpoq. Islandimi illoqarfiit pingaarnersaanni niviarsiaq 20-inik ukiulik, sapaatip akunnerata naanerani tammaaneqalerpoq. Tammaaneqarneranut kalaallit umiarsuaatileqatigiiffiani inuttat ilaat erngerlutik pasineqalerput.

Nutaarsiassaq tamanna tallimanngornerup tungaanut sammineqarpoq. Polar Nanormi inuttat katillugit sisamat tigusarineqarput.

Tigusarineqartunit ataaseq niviarsissap 20-inik ukiullip tammaaneqarneranut atatillugu politiit kilisaammi misisissuipput tassanilu hashi 20 kiilu nassaarineqarmat tigusarineqarpoq.

Tigusarineqartut pingasut Birna Brjánsdóttirip sapaatiummalli tammaaneqalerneranut atatillugu tigusarineqarput. Tigusarineqartunit pingasunit ataaseq sisamanngormat iperagaavoq, marlulli sapaatit akunnerini marlunni tigummigallagassanngortinneqarlutik.

Niviarsiaq 20-inik ukiulik suli nassaarineqanngilaq, Islandimi politiit immikkut ilisimasalinnik sapaatip akunnerata naanerani misissuisitsiniarput. Itinerusumik tamanna uani atuaruk.

Ilanngutassianik allanik maani KNR.gl-imi atuagaqarsinnaavutit.