Nutaamik tapeeriaaseqalerusupput
Taama pisoqassaaq Kommunit Kattuffiata Naalakkersuisullu siunissami tapeeriaatsimut siunnersuutaat piviusunngussagaluarpat. Pineqartut siunnersuutigaat siunissami tapeeriaaseqarnermi meeqqat utoqqaallu amerlassusaat tunngavigineqartalissasut.
Kommunerujussuanngortunut tapiissuteqartarnermi utoqqaat 64-ileereersimasut qassiuneri kiisalu qassit 18-t inorlugit ukioqarnersut aallaavigineqartalerusuppoq.
Aappaatut, kommunerujussuanngortumi sulisinnaasut tassa pilersuisinnaasut qassiunerat tunngavigineqartalerusuppoq.
Siunnersuut piviusunngussappat kommunerujussuit amerlavallaanik 18-t 64-illu akornanni ukiulinnik innuttaqartut aningaasatigut inissisimanerat ajornerulissaaq, kommunimut tapiissutaasartoq appartussaassammat, tassa takorloorneqarmat taamatut ukiullit suliffeqassasut tamaalillutillu akileraartarlutik.