Nutaamik kisitsineq avammut tunisisalertitsisinnaasoq

Pinngortitaq pillugu nunarsuaq tamakkerlugu suliniaqatigiiffiup WWF-ip Nunatsinni suliniutinik ataqatigiissaarisua, Kaare Winther Hansen taama oqarpoq.

- Nannut amerlassussaat eqqornerullugit pitsaanerusumik aqutsisinnangornermik tamanna kinguneqarsinnaavoq, Kaare Winther Hansen oqarpoq.

Avannaata-kitaani nannut amerlassusaat siusinnerusukkut kisitsinermit amerlanerusut pinngortitaleriffimmit kisitsisit nutaat takutippaat.

Kisitsigissaarneq nanoqarnerutitsisoq

Tamannali nanoqarnerulersimaneranik takussutissiinngilaq, kisinneqarnikuusimasumiilli nutaamik kisitsineq ajunnginneruinnarpoq. Tamannalu ajunngilluinnartoq, Kaare Winther Hansen oqarpoq.

- Taamaalilluta attanneqarsinnaasumik piniarsinnaavugut, taamaaliornikkullu kalaallit atajuaannartumik nannunniarsinnaasinnaassaannut akuerineqarsinnaavugut kitaaniillu amernik avammut nioqquteqarsinnaalissalluta, Kaare Winther Hansen oqarpoq.

AAMMA ATUARUK Nannunik Ittoqqortoormiinut qaninngoortunik toqutsisoqassaartoq

Ingerlatsilluarneq pisassarititallu nutaanik periarfissiisartut, Kaare Winther Hansenip oqaatigaa.

Nannut amiinik avammut nioqquteqarneq kalaallit piniartut aningaasaqarnerannut nutaanik periarfissiisinnaavoq, Kaare Winther Hansen oqarpoq.

Taassuma ilanngullugu oqaatigaa, tunumi nannut aamma kisinneqaleruttortut. Kisinneqarnerilu 2020-mi inaarneqarnissaat naatsorsuutigineqarpoq. Tamanna Nunatsinni sumiiffinnut tamanut atajuaannartumik pisassiissuteqarnissamik periarfissiinerusoq, Kaare Wither Hansenip oqaatigaa.

AAMMA ATUARUK Nannut piaraat Issittumi mingutsitsinermit eqqugaanerpaasartut