Nutaamik isumaqatigiissuteqarnikkut Nuummi suliffissat 95-it qulakkeerneqartut
Inuit ukiormanna 20-t aappaagulu 75-it piginnaangorsaqqinneqarnissaat siunertaavoq.
"Ikiorti aamma alla" isumaqatigiissut soorlu taama taaguuserneqarsimasoq, borgmester Asii Chemnitz Narupip aamma Nuummi sulisitsisut siulittaasuata Kristian Kilimep pingasunngormat kingullermik atsioqatigiissutigaat.
Isumaqatigiissut illuatungeriinnit isumalluarfigineqaqaaq.
- Sapinngisamik innuttaasut amerlasuut pisortanit pilersorneqarnerisa qimanneqarnissaa aamma imalimmik inuuneqalernissaat kissaatigaarput, Asii Chemnitz Narup oqalugiarnermini oqarpoq.
Piginnaanngorsaqqinneqartussat kommunimit qaammatit tamaasa Sulisitsisut Peqatigiiffiannut nalunaarutigineqartassapput, Sulisitsisullu Peqatigiiffiannit piginnaanngorsaaqqiffissanik nassaarsiortoqartassalluni.
Ukiortaartinnagu 20-t sulilersinniarneqarput
Piginnaanngorsaqqiinermi amerlanerpaat ikiorserneqarnissaat anguniarlugu kommuni akissarsiatigut tapiissuteqartassaaq.
Ukiortaartinnagu inuit 20-t sulilersinneqarnissaat piviusorsiortuusoq, Ingerlatsiviup pisortaata Grethe Nielsenip oqaatigaa.
- Piginnaanngorsaqqinneqartussanik piukkunnartorpassuarnik peqarpugut, suliffeqarfiillu ilassinnilluuarput, taamaammaallu isumaqatigiissut aqqutigalugu amerlasuut sulilerseqqinneqarnissaat naatsorsuutigaarput, Grethe Nielsen tusagassiuutinut nalunaarummi taama issuarneqarpoq.