Nunavut siunissagissaarpoq
- Naggueqatigiit Inuit inuusuttut qaffasinnerusunik ilinigaqartut amerlapput, siunissamilu aqutsisussatut ineriartorlutik, Nunavut namminersornerulerneranik tunngaviliisut ilaat Tagak Curley KNR-imut oqarpoq.
Tagak Curley Ottawami qanittumi ataatsimeeqataasoq KNR-imit oqaloqatigineqarpoq.
Tagaq Curley Nunavut namminersornerulerneranik tunngaviliisut ilagaat, aamma inuit kattuffianni Inuit Tapiriit Kanatami præsidentiusimavoq kiisalu Nordvestteritoriami Nunavummilu naalakkersuisuini ilaasortaasimalluni.
Nunavummi ajornartorsiuterpassuaqarnera isertuunneqarsinnaanngilaq.
Tagaq Curleyillu tamanna allatut isigaa.
Taanna KNR-mut oqarpoq, isumalluannginnermut nammineq piffissaqarani unammilligassarpassuaqarmat aamma naggueqatigiit inuit inuusuttai qaffasissumik ilinniagaqartut amerlammata taakkualu siunissami aqutsisunngornissaminnut ineriartormata, tamannalu nuannersuusoq isumalluarnartorlu.
Taassuma KNR-imut ilanngullugu oqaluttuaraa, Nunavut namminersulernera pillugu isumaqatigiissut ineriartortuaannarmat namminerlu anguniagarigamiuk Canadamiut tamarmik paasissagaat naggueqatigiit Inuit tassaasut issittumi oqartussaasut Canadamiullu allat tikeraartuusut.
- Uagut Canadamiuni pitsaannginnerusutut inissisimanngilagut uagummi tassa siulliulluta Canadamiuugatta, Tagaq Curley KNR-imut taama oqarpoq.