Nunavut Sisimiunilu ilinniarfiit marluk paarlaasseqatigiinnissamik isumaqatigiissuteqartut
Nunavumimi ilinniarfiit marluk Sisimiuni Knud Rasmussenip Højskolia aamma Sanaartornermik Ilinniarfik paarlaasseqatigiinnissamik isumaqatigiissuteqarfigaat, CBC News taama allaaserisaqarpoq.
Ilinniartullu fagit suut toqqassaneraat apeqqutaatillugu inuktitut, kalaallisut tuluttulluunniit oqaatsit atorlugit ilinniartitsisoqartassaaq.
Nunavumi ilinniartitaanermut naalakkersuisoq naapertorlugu, nunat marluusut imminnut assingusupilussuupput, inuktitullu kalaallisullu oqaatsit pingaarnertut atorneqarmata ilinniartut fagit toqqakkatit kisiisa ilinniarfiginagit aamma kulturikkut ilinniagaqassapput.
Nunavut Arctic Collegemi siulittaasup, Joe Adla Kunup, paarlaasseqatigiinnissamik aaqqissuussineq nutaaq aamma allatigut iluaqutissartaqassangatippaa.
- Nunavup Kalaallit Nunaatalu assigiissutigisaat oqaatsivullu pissutigalugit illoqarfissuarni Vancouverimi Torontomilu ilinniarnermut naleqqiullugu ilinniartut sungiussilertupallassinnaassapput, CBC taama oqarpoq.
Isumaqatigiissuteqareeraluartorlu assartuussinikkut qulakkiigassat arlallit suli isumaginiarneqartussaassaapput. Assersuutigalugu Nunavup Sisimiullu akornanni timmisartukkut attaveqanngilaq, aamma ilinniarfiit ilinniartut visumissaannut, ineqartinnissaannut aningaasaqarnermullu tunngasut isumageqqaartussaassavaat.
