Nunavumi arnat angutininngarnit aningaasarsiorluarnerupput

Nunavumi arnat angutininngarnit aningaasarsiaqarnerusut misissuinerit kingulliit takutippaat. Aamma arnat ilinniagartuneruleriartortut nunatsiaq News-mit oqaatigineqarpoq.

Nunavumi inatsisartoqarfimmi allaffimmut iseraanni, sulisuni arnat amerlanerusut takuneqarsinnaavoq, tassani sulisit quliugangata arnat arfineq marluusarput.

Ilinniagarnertuunngorniarfimmi ilinniartut naammassisartut 56 procentii arnaasarput sinnerilu angutaasarlutik. Sapaatip akunerani kingullermi meeqqat atuarfiani annertusisamik angusillutik naammassisut nivissat 17-iupput nukappissallu pingasuinnaallutik.

Ukiuni kingullerni 20-ni naatsorsueqqissaartarfik kisitsisinik katersisarnerani kisitsisit allanngoriartorsimapput, Canadalu ataatsimut isigalugu, Nunavumi arnat Canadap sinneranut naleqqiullugit aningaasarsiaqarnerusarsimapput.

Assersuutitut taaneqarsimavoq ukiumi 2000-mi Nunavumi arnat, arnanut Canadap sinneranut naleqqiullugit ukiumut aningaasatigut isertittagaat koruuninngorlugit 6000 koruunit missaannik ukiumut isertitaqarnerusimallutik. Nunavumi angutit Canadap sinneranut angutinut naleqqiullutik isertitakinnerungaatsiarput, tassa ukiumut 40.000 koruunit missaannik isertitakinnerusimagamik.

Nunavumi angutit suliffissarsiortarnerini immikkoortinneqartarsoralugit, paasiniarlugu immikkut misissuititsisoqassasoq Nunavumi aalajangerneqarpoq.