Nunavimmi inuusuttuaqqat pingasut imminut toqunnerat aliasuutigineqartoq

Inuusuttuaqqat naggueqatigut nuannaartut inequnartullu tamarmik silappaarippasissut, assimiipput, allaaserineqarneralli atuaraanni oqaluttuaq allarujussuuvoq.

Taakkuami tamarmik Kuujjuarmi sapaatit akunneri arfineq pingasut ingerlanerini imminnut toqussimasuupput.

Inuusuttuaqqat taakku pingasut atuarnerminni ingerlalluaraluarput siunissagissaarpasillutillu, maannali qimagutereerput.

Nunavimmi ajornartorsiutit amerlapput, ineqarniarnermillu ajornartorsiutit ajornerpaanut ilapput. Inissaqarniarlutimmi kinguaariit pingasut illuaqqani nutaanngeqisuni isasuunngujoortuni najugaqatigiittariaqartarput.

Siunissami aqutsisussat

Imminut siusinnerusukkut toquttoqartareerpoq, ukuli inuusuttuaqqat pingasut imminnut toqunnerat Kuujjuarmiunut sakkortuvoq. Tassami siunissagissaartutut isigineqaraluarmata.

- Naggueqatigiit inuit nakimaattuugatta maattuut, siunissaq neriuuteqarluarfigaara. Inuusuttulli illersussavagut tapersersortuarlugillu, illoqarfiup borgmesteria, Tunu Napartuk, The Gazzettemut oqarpoq.

- Tassami taakku inatsisilerituunngortussatut, nakorsanngortussatut, ilinniartitsisunngortussatut ingeniørinngortussatut neriuuteqarfigaagut. Inuusuttut siunissami aqutsisussaraavut, Tunu Napartuk oqarpoq.

Nunavik nunarsuarmi nunani tamani imminnut toquttoqarfiunerpaasarpoq.

Canadami innuttaasunit allanit naggueqatigiit inuit inuusuttaat 25-eriaammik amerlanerusut imminnut toquttarput.

---
Marianne Stenbækip ilanngutassiaa Tikaajaat Kristensenimit kalaallisut suliarineqarpoq.