Nunavimmi alianartumik pisoqarnera aliasuutaasoq
Nunavimmiittumi nunaqarfimmi Akulivimmi arfininngormat ullaakkut inuit sisamat toqutaapput, toqutsisuusorineqartoq toqusunut ilaalluni.
Piginneqatigiiffik Makivik Nunavimmi annertuumik ingerlataqartuuvoq. Tassanngaanneersut pisimasoq pillugu tusagassiuutinut nalunaaruteqarput pisimasoq Nunavimmiut tamarmik aliasuutigigaat.
Pasineqartoq 19-iinnarnik ukioqalersoq nunaqarfimmi ikinngumminit nuannaartutut inussiarnersutullu oqaatigineqarpoq, naallu nammineq aamma alianartumik nalaataqarsimagaluarluni ishockeytartutut aamma oqaatigineqarpoq. Pasineqartup arnaa ukiut pingasut matuma siorna ikinngumminit toqutaasimavoq, qatanngutaasalu ilaat aamma imminut toqussimalluni.
AAMMA ATUARUK Nunaqarfimmi Akulivimmi alianartumik pisoqartoq
Taamaattumik aliasunnermik nalaataqarsimaarnermi eqqartorneqaqqilerpoq inoqarfinni minnerni peqqinnissaqarfimmit sullinneqarnissamik pisariaqartitsinerup annertussusaa pillugu. Peqqinnissaqarfik inuit kulturiannik ilisimannittunik inutsitullu oqalussinnaasunik sulisulik.
Tarnip pissusaanik ilisimasalik kujataaniit qaammat allortarlugu tikittartoq naammanngilaq. Maani najuuttoqartuarnissaa pisariaqartipparput. Pisariaqartipparput maaniittuartussaq nunaqarfimmik kulturitsinnillu ilisimannittoq, taamaattumillu ikiuulularsinnaasoq innuttaasut ilaat kinaassutsimik isertuussisoq taama oqarpoq.
