Nunatta Savalimmiullu kiffaanngissuseqarnerusumik periarfissaqarnissaat Løkkep misissorniaraa
Lars Løkke Rasmussenip Folketingimi marlunngormat oqallittoqarnerani tamanna oqaatigaa, nittartagaq Sermitsiaq.AG taama allaaserisaqarpoq.
Ullumikkutut inissisimasoqartillugu, Nunatta Savalimmiullu suliassaqarfiit oqartussaaffigilersimasatik pillugit pisussaaffiliisumik isumaqatigiissusiorsinnaatitaapput. Danmarkili naalagaaffittut suliassaqarfiit sinnerini suli isumaqatigiinniartussaallunilu isumaqatigiissusiortussaavoq.
Taamatullu aaqqissuussisoqarsimanera annertusineqarsinnaanngitsoq Lars Løkke Rasmussenip arlaleriarluni oqaatigisimavaa.
AAMMA ATUARUK Naalagaaffeqatigiinnerput atatiinnassavarput
Aaqqissuussinerli annertusineqarsinnaanersoq misissussallugu ministeriunerup maanna piareersimaffiginerarpaa. Taamaammat naalakkersuisut siulittaasuata, Kim Kielsenip, Savalimmiormiullu lagmandiata Aksel V. Johannesenip, naalagaaffeqatigiinneq pillugu ukiumoortumik Bornholmimi juunip qaammataani ataatsimeeqatiginerini tamanna eqqartorneqartussanngorpoq.
- Savalimmiut Kalaallit Nunaatalu akuuffigisaannik arlaatigut aaqqiagiinngissuteqaleriataannginnerani tamatuma oqaloqatigiissutigineqarnissaa piffissaagallartillugu isumatusaarnerussaaq, Lars Løkke Rasmussen taama oqarpoq.
