Akiliuteqartitsisalersaarneq: Nunatta kommuuniisa takornariartaassuit isertitaqaatigisalertariaqarpaat
Takornariat umiarsuarmut ilaallutik nunatsinnut siorna tikittut 112.273-iupput. Takornariartaassuillu nunatta kommuuniinut akiliuteqartanngikkaluartut ilaasui ikaarsinnaasarput.
Naalakkersuisulli kissaatigisaattut pisoqassappat, takornariartaassuarni ilaasut ikaariaannaasarnerat ukiortaami unissaaq.
Nunatta karsianut tuttussanik takornariartaassuarnut nunatsinni umiarsualivinni talinngasunut akitsuusersueqqilernissamik nunattalu kommuuniisa taakku ilaasuinut akiliuteqartitsisalersinnaanissaannik inatsisissatut siunnersuut, Inatsisartut ukiaru siullermiissavaat.
Avannaata Kommuniata borgmesteriata, Palle Jerimiassenip (attaviitsoq), tamanna nuannaarutigaa. Nunattami kommuuniisa takornariartaassuit nunatsinnut tikittartorpassuit isertitaqaatigisalertariaqaraat, taassuma qangalili noqqaassutigaa.
- Nuannaarutigaara, aamma aallarniutitut isigivara. Taamatut aquutaasinnaasumik pissarsigatta. Tikittartut qassiunissaannut allatigullu aqussinnaalissagatsigit tassuunakkut, aammalu aningaasanik pissarsissutigisinnaalissagatsigit iluarsigassatsinnut allanullu atugassatsinnut, taanna oqarpoq.
Nunatta takornariartaassuarnut tikittunut akitsuusersueqqittalernissaata akiliuteqartitsisalernissaatalu 2025-mi januaarip aallaqqaataani atuutilernissaa pilersaarutaagaluarpoq, Naalakkersuisulli tamanna ukiortaami atuutilertussanngortillugu siuartikkusuppaat.
Borgmesteri: Akiliutigitittaligassatut siunnersuut qaffasinnerusariaqaraluarpoq
Umiarsuit takornariartaatit soorlu illoqarfimmut tulakkaangata kommunit ilaasumut ataatsimut 50 koruunit tungaannut akiuliuteqartitsisalernissaat inatsisitigut periarfissaalissasoq, naalakkersuisut siunnersuutigaat.
Kommunit sumiiffiit sorliiit avatangiisinut aserfallatsaaliuinermullu akitsuummik nutaamik akiliiffiusassanersut nammineq toqqassavaat nalunaarutigalugillu.
Ilaasumulli ataatsimut akiliutigitinneqartartussaq minnerpaamik 150 koruuninut tagginneqassasoq, Palle Jeremiassen isumaqarpoq.
Takornariat umiarsuarlutik Ilulissanuinnaq 2022-mi tikittut 14.730-upput. Taakkualu Ilulissani illoqarfiup angissusai, atortorissaarutai avatangiisiilu eqqarsaatigalugit amerlavallaarput.
- Annertunerusinnaagaluarpoq. Annertunerugaluarpalluunniit allaffissornermut atuinitsinnut matussutissartaa annertusussaassagami iluarsaasinermullu annikittussaassalluni, Palle Jerimiassen oqarpoq.
- Taakkua aningaasat allaffissornermut atugassatsinnut pitsanngorsaanermullu atugassatsinnut aallarniutitut isigisinnaagakkit.
Kommunit takornariartaassuarni ilaasunut akiliutigititatik sunut atussanerlugit namminneq aalajangertassavaat.
Aningaasat taakku umiarsualivinnut takornariartaassuarnit tikinneqartartunut atussallugit, Avannaata Kommuniata borgmesteria siusinnerusukkut oqaatigaa.
Visit Greenlandip nunatsinnut umiarsuarnik takornariaqarneq pillugu nalunaarusiani ukioq manna saqqummerpoq.
Nunarput ornigarneqarsinnaasuni akikinnerpaanut ilaasoq, tassani erserpoq. Assersuutigalugu Norgemi Stavanger, Shetlandip qeqertai Canadamilu Anchorage ornigarneqarsinnaasuni akisunerpaanut ilaapput.
