Nunatta karsia sinneqartooruteqarpoq

Aalisakkat raajallu pissutaallutik Nunatta karsia sinneqartooruteqarpoq. Nunatta karsiata 2016-imut naatsorsuutai naammassillugit kukkunersiorneqareerput. Amigartooruteqarnissarlu naatsorsuutigineqarsimagaluartoq, Nunatta Karsia sinneqartooruteqarpoq.
Assi © : KNR
maajip 19-at 2017 17:44

Nunatta Karsiata 2016-imut naatsorsuutai naammassillugit kukkunersiorneqareerput. Amigartooruteqarnissarlu naatsorsuutigineqarsimagaluartoq, Nunatta Karsia sinneqartooruteqarpoq.

Ingerlatsinermi sanaartornermilu angusat 51 millionit koruuninik sinneqartoorfiupput. Ilassutitut aningaasaliissutit ilanngullugit 260 millionit koruuninik amigartoortussatut missingersuusiortoqarsimagaluartoq.

Nikingassutit taamaasillutik 311 millionit koruuniupput.

AAMMA ATUARUK Nunatta karsia tupaallannartumik sinneqartooruteqarujussuarpoq

Aningaasaqarnermut naalakkersuisoq Aqqaluaq B. Egede naapertorlugu angusat pitsanngoriarsimanerannut aningaasarsiornikkut ingerlatat amerlanerulersimanerat aamma raajanik aalisarnermillu tunisassiat akiisa qaffasinnerat pissutaapput.

Iluanaaruteqarnerunermut pingaarnertut pissutaapput Namminersorlutik Oqartussat ingerlatseqatigiiffiutaasa akileraaruteqarnerusimanerat, aningaasaqarnermut naalakkersuisoq allappoq.