Nunatta Isiginnaartitsisarfia pisortartaalertoq

Nunatta Isiginnaartitsisarfia pisortartaalerpoq, pisortanngortussarlu kulturilerisut silarsaanni ilisimaarineqarluarpoq.

Pisortanngortussaq tassaavoq, Vivi Sørensen.

Vivi Sørensen atorfigiligassaminut takorluugaqarluarluni imminut angusassilluni ullutsinni isiginnaariartartunut pitsaalluartunik isiginnaagassianik inerisaarusuttuummat toqqaritsik, Nunatta Isiginnaartitsisarfiata siulersuisui tusagassiorfinnut nalunaarumminni allapput.

Aamma inuusuttunngoriartortut isiginnaariartarnissaat angutserlugit suliniuteqarumasuusoq taamalillunilu isiginnaartitsisarfiup ilisimaneqarnerulernissaanik suliniuteqarumasuusoq, siulersuisut ilanngullugu allapput.

- Vivi immikkuullarilluinnartumik misilittagaqarpoq. Meeraallunili isiginnnaartitsisartuuvoq, Den Danske Scenekunstskolemilu ilinniagaqartuulluni kingorna inerisaqqillugu  ”Master of Fine Arts in Theatre Directing” University of Ottawami, taamaammat tulluaqqissaarsimavoq takorluukkani Nunatta Isiginnaartitsisarfia aqqutigalugu inerisaqqitsinnissaanut matuersaasernissaa, Nunatta Isiginnaartitsisarfiata siulersuisuisa siulittaasuat Kimmernaq Kjeldsen tusagassiorfinnut nalunnaarummi allappoq.

Vivi Sørensen isiginnaartitsinermik ilinniartitsinermi akisussaasutut Nunatta Isiginnaartitsisarfiani maanna atorfeqarpoq.

Nunatta Isiginnaartitsisarfiani sulianik nutaaliorfiulereersunik nangitsinissi taassuma qilanaaraa.

- Akisussaaffingaatsiamik tunineqarpunga, Nunatta Isiginnaartitsisarfiata sulisui allat, isiginnaartitsisartut isiginnaariartartugullu peqatigalugit nunatta tamarmi qamuuna pisuunnguallatsittarsinnaanissaanut sulissaanga, taanna oqarpoq nangillunilu:

- Nunatta Isiginnaartitsisarfia pisoqarfittut nunatsinnut tamanut allatut ilukkut anersaarfiusinnaanissaa takorluugaraara.

Vivi Sørensen Nunatta Isiginnaartitsisarfiani juunip aallaqqaataani pisortanngussaaq.