Nunatta Isiginnaartitsisarfia isiginnaagassiortussanik pikkorissaasoq

Tamanna sapaatit-akunnerani uani akissutissarsineqassaaq, Nunattami Isiginnaartitsisarfiani isiginnaagassiornermik pikkorissaasoqarmat.

Oqaluttualiornermik soqutigisallit nunatsinneersut arfineq-pingasut peqataanissamut toqqarneqarsimapput, taakkulu sapaatit-akunnerata ingerlanerani isiginnaartitsineq, allalluni oqaluttualiorneq isiginnaartitsisarfiullu sakkugisai pillugit immikkut ittumik paasisaqarput.

Ullut tamaasa allallutik oqaluttualiornermik sungiusartinneqarput, isiginnaagassiortumillu danskimit Michel Bondemit, isiginnaagassiortarnermik ukiorpassuarni misilittagaqartumit ilitsersorneqarput.

Isiginnaartitsisarfiup pisortaa, Svenn Syrin, taama oqaluttuarpoq:

- Isiginnaagassiorsinnaasunik nunatsinneersunik amigaateqarpugut. Hans Lyngep Aningaasaateqarfiata taamatut pikkorissartitsinissatsinnut tapiiffigisinnaasimammatigut nuannaarutigaarput. Pikkorissunimmi nutaanik pissarsiorpugut kingornalu taakku allalluni suliassanik, ilitsersuisumut ikiortitut suliassanik imaluunniit Isiginnaartitsisarfiup suleriaasiinik siunissami malittarisaqarnissamik neqeroorfigisinnaavagut, Syrin taama oqarpoq.

Isiginnaartitsinermik ilinniarfiup ilinniartui sisamaasut isiginnaartitsisarfimmilu isiginnaartitsisartut marluk, sapaatit-akunnerata ingerlanerani allalluni suliarineqartunik isiginnaartitsissapput.

Aqagulu arfininngornermi, sapaatit-akunnerata ingerlanerani pikkorissartitsisoqarnerani naammassineqartut soqutiginnittunit takuniarneqarsinnaassapput.

Tamannalu Nunatta Isiginnaartitsisarfiata illuutaani Nuummi Industrivejimi aqagu arfininngornermi nal. 15.00 pissaaq, isernerlu akeqassanngilaq.

Peqataasut tassaapput: Minik Bidstrup Petersen, Naja Rosing-Asvid, Maaliaaraq Nielsen, Frederik «Kunngi» Kristensen, Birte Olsen, Maasi Chemnitz, Tuperna Larsen aamma Markus E. Olsen.