Assi: Suzanne Hamilton/Flickr Creative Commons

Nunatta imartaani plastikkinik ulikkaartoq

Nunatta imartaani eqqakkat plastikkimik akullit naatsorsuutigisamit ajornerusut.

Aarhusip Universitetianiit ilisimatooq, Jakob Strand nunatta imartaani plastikkit eqqakkat ajornartorsiutaanerannik misissueqqammersoq taama oqarpoq.

- Paasisaq tupaallaatigilaarpara. Pingaartumik qanoq amerlatiginerat Nordsømi takusartakkanut sanillersuunneqarsinnaammata, Jakob Strand oqarpoq.

Nunatta imartaanut plastikkit igiinnarneqartartut peqqissaarussamik aatsaat misissorneqarput.

AAMMA ATUARUK Imarpiit plastikkinik igitakunik ulikkaaraluttuinnarput

Eqqagassat nunameersut

Misissuinerup takutippaa, plastikkit imaanut igitakkat tamarmiusut 20 procentiinnaat umiarsuarniit ingitaasut, aalisarnermit pisuullutik imaluunniit immap sarfaa pissutigalugu nunatta imartaanut apuussimasut.

- Eqqakkat plastikkiusut amerlanerpaat nunatsinneersuupput, tassalu illoqarfinniit, eqqaavissuarniit, aalisarnermiit allaniillu. Sumiiffiit ilaanni plastikkitallit imaanut katataapput.

Plastikkillu imartatsinni ajornartorsiutaajunnaassappata nunami plastikkinik eqqaaneq qanoq iliuuseqarfigisariaqarpoq.

Plastikinimmi eqqaaneq avatangiisinut sunniuteqarsinnaavoq. Kusanannginnerata saniatigut uumasunut aamma pitsaanngitsumik sunniuteqarsinnaavoq.

- Uumasut nermugussaasinnaapput, nerisaannut akulerussinnaapput, nerisaasa ingerlaarnerannut akornutinngorsinnaallutik, plastikkillu akuutissartaat avatangiisinut ingerlaqqissinnaallutik, Jakob Strand oqarpoq.

Misissuinermi paasineqartut ilagaat nunatsinni uumasut Malamuit 85 procentii plastikkinik akulinnik nerisaqartarsimasut.

AAMMA ATUARUK ARTEK-ip peqataaffigisaa nersornaasigaasoq

Inunnut sunniutaat suli ilisimaneqanngitsut

Plastikkit eqqakkat qanoq inunnut sunniuteqartarnerat  suli oqaatigineqarsinnaanngikkallarpoq.

Plastikkit inuit nerisaannut qanoq sunniuteqartarnersut nunarsuaq tamakkerlugu aatsaat misissorneqaleruttorpoq.

- Nunarsuatsinnili sumiiffinni allani misissuinernit plastikkit mikisualuttai uilluni, aalisakkani, peqqussuarni allanilu nassaarineqartartut takutinneqarsimavoq.

- Tamannalu Kalaallit Nunaata imartaani avatangiisini aamma pisimanissaa qularineqarsinnaanngilaq, Aarhus Universitetimi ilisimatooq, Jakob Strand oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!