Timersorneq

PAN AM Nunatta Guatemala ajorsartippaa

Nunatta ilimagineqareersutut Guatemala ippassaq ajorsartippaa. Guatemala unammersuarnerni ataasiarluniluunniit ajugaasimanngilaq.

Allattoq Aaqqissuisoqarfik / Redaktionen

juunip 17-at 2016 06:12

Unamminerup muminnerani nunatta unammisartui 25-13-imik siuaqqapput, unamminerlu naammassimmat nunarput 45-23-mik ajugaavoq.

Nunatta unammisartui saassuseriasaartarnermikkut amerlasuupilussuarnik isertitsipput, Lars Møller aamma Inuujuk O. Søholm unamminermi isertitsinerpaallutik.

Lars Møller 16-inik isertitsivoq, taamaalillunilu Minik Dahl Høeghilu isertitamikkut naligiilerlutik, Minik Dahl Høeghimi nunamut allamut unamminermi aamma 16-eraarluni isertitsereernikuummat, soorlu aamma USA-mut Chilemullu unamminerni taamaaliortoq.

Aamma atuaruk Unammersuarnerit Nuummi ingerlanneqarsinnaasut

- Unammisavut ilinniarniarlutik peqataapput, taamaattumillu nunanit unammisatsinnit allanit unammineq oqinneruvoq. Tamannalu atorluarlugu unammisartuvut tamaasa unammisippagut, taamaalillutalu aamma takusinnaavarput unammisartuvut siornatigumut naleqqiullutik tamarmik pikkorilluinnartuusut. Unammisartuvut akisussaassuseqarluarlutik unammipput unamminerlu naallugu pimoorussilluarput, nunanut allanut unammisartut sungiusaasuat Niels Møller unamminerup kingorna taama oqarpoq.

Aamma atuaruk ASSIT & VIDEO Argentinamut ajugaareerlutik nuannattut takukkit

Aamma atuaruk Minik: Tupinnarpoq