Nunatta EU-llu akornanni aalisarneq pillugu isumaqatigiissummut ilassut nutaaq atsiorneqartoq

Tallimanngormat novembarip ulluisa 27-anni atsioqatigiittoqarpoq, Nunatta EU-mi sinniisoqarfiani pisortaq Lida Lennert, Namminersorlutik Oqartussat sinnerlugit atsiortuuvoq, EU-llu Luxembourgimi siulittaasoqarfianit aallartitaq Gerge Frieden, Danmarkillu aallartitaa Vibeke Pasternak Jørgensen sinniisoralugit atsiortoqarluni.

- Kalaallit Nunaata EU-mik peqateqarneq iluarisimaartorujussuuaa, taannalu Kalaallit Nunaata EU-llu suleqatigiinneranni ataatsimut nalunaarummi naqissuserneqarpoq, tassani aalisarneq pingaaruteqartumik immikkoortuulluni, Lida Lennert, tusagassiuutinut nalunaarummi taama oqarpoq.

Aalisarnermut piumasaqaatit isumaqatigiissummut ilassummi nutaami immikkoortuni arlalinni nutarterneqarput, EU-p aalisarneq pillugu isumaqatigiissummut atuuttumut akiliutaata allanngunnginnissaa isumaqatigiissummi qulakkeerneqarluni. Taassumalu kinguneranik ukiuni tallimani isumaqatigiissummut ilassutip atuunnerani 674 millionit koruunit missaat Nunatsinnut akiliutigineqassapput. Akiliutillu aalisarnermi pisassiissutinut akiliutinut, aalisariutaatileqatigiiffiit akiliutaannut aalisarnermullu missingersuutinut tapiissutinut agguarneqassallutik.