Nunatta Danmarkillu aatsitassarsiornissami malittarisassat isumaqatigiinngissutigigaat
Kina aqerlumik zinkimillu Nunatsinni piiaasinnaanersoq pisisinnaanersorlu Danmarkip aalajangissanngilaa.
KNR-ip pissarisimasaani nunanut allanut ministereqarfimmut Københavnimiittumut, inuussutissarsiornermut, suliffeqarnermut, niuernermut nukissiuteqarnermullu naalakkersuisoqarfiup nunanullu allanut pisortaqarfimmiup allagarisimasaanni taama allassimavoq.
Suliaq allakkami allami nunanut allanut ministereqarfiup allattoqarfiata pisortaanit Namminersorlutik Oqartussanut nassiussami aallarnerneqarpoq. Tassanilu danskit ministereqarfiata Citronen Fjordenimi suliniutip siunnerfia ima nalilerpaa:
”Citronen Fjordimi pilersaarusiarsuaq pilersaarutit malillugit ingerlanneqassappat, naalagaaffiup nunanut allanut- illersornissamut- sillimaniarnermullu politikkiata soqutigisaanut unioqqutitsissaaq,” taama allassimavoq.
Ministereqarfiup aamma nalilerpaa, aatsitassarsiorniarnermik suliniut Namminersorlutik Oqartussat inatsisaaniittoq, Kalaallillu Nunaata nunap aatsitassarsiorneq akisussaaffigilernikuugaa.
Aalajangiisinnaanissamut unammineq
Suliniulli Danmarkimit mattunneqanngikkaluartoq, Danmarkip naliliisinnaanera kukkunerusoq, Namminersorlutik Oqartussat isumaqarput.
Nunarput Danmarkilu uranimik avammut nioqquteqarnissamut aatsitassallu qaqutigoortut pillugit isumaqatigiissuteqarput, tassalu danskit naalakkersoqarfia piianissamut suliniutinik ilisimatittarnissaa. Aqerlorli zinkilu taakkununnga ilaanngillat, taamaammat Danmark suliamut isumaqarsinnaanngilaq.
Danskit nunanut allanut ministereqarfiata inuussutissarsiornermut, suliffeqarnermut, niuernermut nukissiuteqarnermullu naalakkersuisoqarfimmut nunanullu allanut aqutsisoqarfimmut allagaani ima erseqqissarneqarpoq:
”Suliniutit taakku akuerineqassanersut Namminersorlutik Oqartussat kisimik aalajangigassaraat. Danskit naalakkersuisoqarfiat aatsitassaqarnermut inatsisinik atortitsisoqanngillat, tunngaviusumillu inatsiseqarnatik, nunanullu allanut ministereqarfiup mailimi allagaa piginnaaneqarnermik agguaanermut unioqqutitsivoq taamalu imaqarnani”.
Nunanut allanut pisortaqarfik naapertorlugu, aatsitassanut suliniut ass. rubiinik savimmerngillu pillugit Danmark siusinnerusukkut saaffiginnissuteqarnikuunngilaq.
AAMMA ATUARUK Ironbark Citronen Fjordimi aatsitassarsiornissamik akuersissummik tunineqartoq
Nunanut alla
nut ministereqarfik: Isumannaassusermut apeqqut
Namminersorlutik Oqartussat naapertorlugit, danskit akulerunnerata aatsitassarsiornerup ingerlatsivianut aningaasaliisut nalornilersinnaanerat ernummatigineqarpoq.
Aammalu – naggaterpiaani – Danmarkip nunanut allanut sillimaniarnermullu politikki eqqarsaatigalugu aatsitassarsiornermut suliniutit siunissami unitsivissinnaammagit.
KNR-ip nunanut allanut ministereqarfik ilaatigut Namminersorlutik Oqartussanit isornartorsiorneqarnertik pillugu akissuteqartinniarpaa. Kiisalu Citronen Fjordimi aatsitassarsiornermut pilersaarusiarsuarmut sooq naliliinerat oqaaseqarfigitinniarlugu.
Ministereqarfillu toqqaannartumik akissuteqanngilaq, KNR-imulli mailimi allappoq:
- Tassunga pineqartumut ataqatigiittumik Danskit naalakkersuisuisa kisimi nunanut allanut- sillimaniarmut- illersornissamulluunniit politikkip sammivia ilaatigut annertunerusoq imalt. nunami allamiut qaffasinnersumik aningaasaliinissaat pineqartoq. Kalaallit Nunaanni aatsitassarsiornissamut pilersaarutinut akuersissutit Namminersorlutik Oqartussat tunniuttarpaat. Danskit naalakkersuisuisa tamanna apeqqusinngilaat.
