Nunatta Canadallu akornanni timmisartuussisarnissaq inissippoq
Timmisartuussisarnissamut pilersaarut suliarineqarpoq ulloq taanna Canadami illoqarfiit allat tikinneqarsinnaanngorlugit soorlu Ottawa, Toronto, St. Johns, Goose Bay aamma Vancouver. Taassuma saniatigut nunatsinnut ikaartut ulloq taanna Ilulissanut Kangerlussuarmullu ingerlaqqissinnaapput.
- Aqqut pilersinneqarpoq niuerfissanik nutaanik ineriartortunillu periarfissaqarnera takusinnaagatsigu, minnerunngitsumik Amerikap avannaaniit uuliasiortunut aamma aatsitassarsiortunut niuerneq tunngavigalugu angalasunut. Aqqummi taanna atorlugu piffissaq aningaasallu sipaarneqarsinnaapput, Nuummiit Ottawa-mut, Keflavik-ikkoornermut København-ikkoornermullu sanilliullugu, nal.ak. arfinillit ataallugit angalasoqarsinnaassammat, Air Greenlandimi niuernermut pisortaq Christian Keldsen nalunaarpoq.
Nuup Iqaluillu akornanni angalanermi siumuinnaq 3.027 koruuneqassaaq Ottawa-mullu angalaniaraanni siumuinnaq 6.277 koruuneqassalluni.
- First Air-mik suleqateqarnissamut isumaqatigiissutitta atuisoq nunatsinneersoq Iqalunniit Ottawa-mut ajornanngitsumik www.airgreenland.gl–ikkut bilitsisinissamut periarfissippaa. Aamma First Air-ip nittartagaatigut Canadami illoqarfinnut allanut bilitsisinissaq periarfissaqarpoq. Angalanerup sivikinnerata nassataanik ingerlatsiviit ullormusianut unnuinernullu aningaasartuutinik annertuumik sipaaruteqartissavai – aammalumi bilitsip akia unammillersinnaalluarpoq, soorlu Islandikkornermut aammalu Kalaallit Nunaata Canadallu akornanni attartorluni timmisartuussisarneq eqqarsaatigalugit, Christian Kjeldsen oqarpoq.
Timmisartuussineq juunip 15-ianiit septemberip pingajuata tungaanut ingerlanneqassaaq.