Ole Christiansen: Nunatta ajornartorsiutai nuisinneqarput

- Nunatta ajornartorsiutai assigiinngitsut arlallit uani nuisinneqarput, ujarassiooq Ole Christiansen oqarpoq.

Fraser Institutep ukiumoortumik allattorsimaffiani appariarujussuarpugut. Nunarput institutip allattorsimaffiani Europamut ilaavoq, tassanilu appariarnerpaajulluni.

Nunatsinni akileraartarnermut sulisussanillu tunngasunut aaqqissuussat politikkikkullu ingerlatsineq aatsitassanik suliaqartunit 2015-imut naleqqiullugu ajornerusutut siorna nalilerneqarsimasut, nalunaarusiami allaqqavoq.

Aamma attaveqatigiinnermut atortulersuutit Nunatsinni ajoreersut Ole Christiansenip erseqqissaatigaa, taamaammallu Nunatsinni aatsitassarsiornissaq akisoorujussuulluni.

AAMMA ATUARUK Nunatsinni aatsitassarsiornerup siunissaa Sulisitsisut ernumagaat

Tamatumalu saniatigut royaltimik akileraaruteqartoqartassasoq politikerinit siornatigut aalajangerneqarpoq.

- Siumoortumik aningaasaliinerit annertuut pisariaqartarput. Taavalu Nunatta tassani piumasarilersimavaa, qalluineq aallartippat akileraarutit ulloq siullerminngaanniit akilerneqartalissasut. Taamatut piumasaqaateqartoqarneq, eqqarsarpunga, Nunami aatsitassanik qalluiffimmik suli ingerlatsiffiunngitsumi immaqa siusippallaartoq eqqunneqarsimasut.

Ingerlatseqatigiiffiillu Nunatsinni misilittagaqarnerloreerput.

- Ukiuni kingullerni marlunni akiliisinnaajunnaarnerit marluk pipput. Akiliisinnaajunnaarnerillu taakkua pissutaallutik aningaasarpassuit annaaneqarput. Imaappoq, aningaasaliisartut Nunatsinnullu ullumikkut aningaasaleerusussimasinnaagunaraluartut taamanikkut aningaasaliissutigisimasatik amerlasoorujussuit annaanikuuaat. Aningaasat millionit untritilikkaat arlallit tassani annaaneqarput.

Aatsitassarsiortullu Nunatsinni politikkikkut ingerlatsineq pikkuginngikkaat, Ole Christiansenip oqaatigaa.

- Soorlu uani qinigaaffimmi maannakkut ingerlasumi aatsitassanut naalakkersuisut pingajuat massakkut ingerlatsivoq, ujarassiooq oqarpoq.

Aamma uranimik piiaasoqarnissaa akuerineqareeraluartoq, qanoq piiaasoqarsinnaanersoq nassuiarneqarluarsimanngitsoq, Ole Christiansenip oqaatigaa.

Taakkualu ajornerusumik nalilerneqarnitsinnut pissutaasunut tassa ilaapput.

Aatsitassarsiornermillu suliaqartut isummaminnik ulluinnarni oqaatigisinnaanngisaminnik periarfissinneqarlutik taama naliliimmata ilungersunartutut tiguneqartariaqartoq ujarassiooq oqarpoq.

- Taamaammallu Kalaallit Nunaanni pisortat oqartusallu maalaarutigineqartunut tusarnaarluartariaqartut, ujarassiooq Ole Christiansen oqarpoq.