Nunatsinniit aallartut pillugit nalunaarusiaq
Nutartigaq ataasinngorneq nal. 9.50:
Nunatsinniit nuuttartut amerliartuinnarnerat pillugu sukumiisumik nalunaarusiorsinnaaniarlutik maajip arfernaniit tyviata tungaanut immersugassaq atorlugu nittartakkatigut Naalakkersuisut misissuissapput. Aningaasaqarnermut Naalakkersuisoqarfik suliniut aallartisarpaat, Inuit Ataqatigiit siulittaasuat Sara Olsvig sammisaq pillugu siunnersuuteqaruttortoq.
Nuuttarneq pillugu nuuttarneq.gl-imi immersuigit
Ukiut 20-it ingerlaneranni innuttaasut aatsaat taamak ikitsigipput
Kalaallit Nunaanni Naatsorsueqqissaartarfik naapertorlugu ukiut 20-t ingerlaneranni nunatsinni innuttaasut aatsaat taamak ikitsigipput.
- Soorunami iliuuseqarfigineqartariaqartutut isigaarput nunatsinni innuttaasut ikiliartuinnarnerat. Taanna akiortariaqarparput, taamaammallu aalajangiiffissatut siunnersuuteqarpugut misissuilluni nalunaarusiortoqassasoq sooq inuit nuuttarnersut, suminngaanniit nuuttarpat qanorlu iliorluta innuttaasut ikiliartuinnarnerat akiorsinnaavarput?, Sara Olsvig KNR-imut oqarpoq oqarpoq.
Innuttaasullu nunatsinniiginnarnissaat anguniarlugu nunatsinni sunik allannguisoqarsinnaanersoq Sara Olsvig siunnersuutissaqarpoq.
- isumaqarpugut qulaajaasoqarnissaa piffissanngortoq; sooruna inuit nuuttartut, sunaana ujartorlugu Danmarkimut nuuttut taama amerlatigisut? Takorloorsinnaavarput isumaginninnikkut annertuumik suliassaqartugut. Kaammattuutigaarput nunatsinni una suliassaq politikkikkut ataatsimoorutigissagipput. Ataatsimoorluta innuttaasut ikiliartuaarnerat akiortariaqaratsigu, Sara Olsvig oqarpoq.
Immersugassaq nuuttarneq.gl-ikkut immersorneqarsinnaavoq.
Siunnersuut Inatsisartuni maajip qulingiluaanni oqaluuserineqaqqaassaaq.
Januaarip aallaqqaataani 2016-imi 55.847-t Kalaallit Nunaanni najugaqarput, taamaalillunilu nunatsinni innuttaasut ukiut 20-t kingulliit ingerlaneranni aatsaat taamak ikitsigilersimapput.
