Takornarialerisut nutaat: Nunatsinni takornariarneq ajornannginnerulissaaq

Nunatsinni pisariinnerusumik takornariartalernissaq, suliffeqarfiup Guide to Greenlandip nittartagaliorluni qulakkeerniarpaa.
Guide to Greenland
Assi © : Guide to Greenland
juunip 14-at 2017 13:08

Nunatsinni nutaamik takornarialerisoqalerpoq.

Nunatsinni pisariinnerusumik takornariartalernissaq, suliffeqarfiup Guide to Greenlandip nittartagaliorluni qulakkeerniarpaa. Takornariallu angalaniaraangamik taanna atorlugu namminneerlutik inniminniisassapput.

- Maluginiaratsigu nunatsinni takornarianut nittarsaassigaluarluni neqeroorutit amerlavallaanngitsut. Taamaammat immitsinnut aperivugut nunatsinnut takornariartut qanoq amerlisinnaanerigut, taannalu tunngavigalugu Guide to Greenland aallartipparput, suliffeqarfimmik aallarneeqataasoq, Hans Jørgen Mørch, oqarpoq.

Periarfissat amerliartortut

Takornariat suliffeqarfiup nittartagaa atorlugu nunatsinni misigisassiissutinik angalatitsivinniit sumiiffinnilu takornariatsitsisunit neqeroorutinik aallersinnaanngorput.

- Assersuutigalugu Tasiilaliarusukkaanni, taava Tasiilamut tunngasut, soorlu angalanissamut unnuinissamullu periarfissat assigiinngitsut nittartakkami saqqummissapput.

Takornarianullu misigisassiissutitut aaqqissuussat neqeroorutigineqartut amerlilereersimapput: 

- Misigisassiissutitut aaqqissuussat takornarianut neqeroorutigineqartut 132-t missaanniipput. Taassuma saniatigut akunnittarfiit unnuisarfiillu assigiinngitsut 14-it missaanniipput, sulilu amerliartorlutik, Hans Jørgen Mørch oqarpoq.

Isumalluartut

Suliffeqarfik taanna nutaaq takornarianut nittarsaassisumut Visit Greenlandimut isumalluartitsivoq.

- Takornariat namminneerlutik inniminneerusuttartut ukiuni kingullerni amerligaluttuinnaramik taanna (Guide to Greenland, aaqq.) periarfissatsialassuuvoq. Taamaammat Visit Greenlandiminngaanniit isumaqarpugut suliaq taanna torrattorujussuusoq, Visit Greenlandimi pisortamut tullersortaagallartoq, Mads Daniel Skifte, oqarpoq.

Suliffeqarfik siorna ukiakkut piareerpoq, nunarsuarmilu tamarmi soqutiginnittut amerliartorput.

Guide to Greenlandip nittartagaata tuluttuinnaq ingerlanneqarallartup, ilaatigut kalaallisut, franskisut, kinamiusut, spanskisut koreamiusullu aamma nutserneqarpat amerlanerusut soqutiginnilernissaat, takornarialerisut naatsorsuutigaat:

- Tassunga killikkutta tikikkusuttut ilimagaarput amerlanerulissasut, Hans Jørgen Mørch oqarpoq.