Nunatsinni pinngitsaaliinerit nunarsuarmi amerlanersaasut
Pingitsaaliinerit Naalagaaffiit Peqatigiit Ikiaroornartut Pinerluttulerinerlu pillugit Sullissiviannut nalunaarutigineqarsimasut aviisip misissorsimavai.
Nalunaarsukkallu takutippaat Nunatsinni pingitsaaliinerit nalunaarutigineqartut Danmarkimut naleqqiullugit 39-riaammik amerlanerusut, innuttaasut amerlassusaannut sanilliukkaanni.
Pinngitsaaliinerit 132-t siorna politiinut nalunaarutigineqarsimapput, Nunarpullu taamaalilluni Naalagaaffiit Peqatigiit pinngitsaaliinerit pillugit allattorsimaffianni qulliulluni inissisimalluni.
AAMMA ATUARUK Politiit ukiumoortumik kisitsisitigut paasissutissaataat nikalluallannartut
Tunumi ingasannerpaavoq
Ilisimatuup Avannaani inuusuttut 269-it akornanni misissuinermik ingerlatsisimasup oqaatigaa pissutsit "ilungersunartuusut".
- Kalaallit arnat inuusuttut pinngitsaalisaallutik arneriffigineqartarnerat ajoraluartumik atugaasupilussuuvoq - eqqugaasullu illoqarfinni mikinerni nunaqarfinnilu amerlanerupput, ph. d.-nngorniaq Sidsel Karsberg taama oqarpoq.
Inuusuttut misissuinermi peqataasut 269-iusut akornanni arnat inuusuttut 14 procentii angutillu inuusuttut 3,5 procentii pinngitsaalineqarsimapput.
Pinngitsaaliinerit siorna nalunaarutigineqartut amerlanersaat Tasiilami pigisaanilu pisimapput, innuttaasunit 1930-iusunit suliat 24-t aallartinneqarsimallutik.
Aaja danskit tungaannit iliuuseqartoqarnissaanik piumasaqarniarpoq
Folketingimut ilaasortap Inuit Ataqatigiinneersup Aaja Chemnitz Larsenip ajornartorsiut danskit inatsisinik atuutitsinermut ministeriannut saqqummiunniarpaa, Nunatsinni eqqartuussiveqarnermut akisussaaffik suli danskit naalagaaffiata ataaniimmat.
- Kisitsisit quarsaarnartuupput. Ajornartorsiuteqarpugut iliuuseqarfigisariaqakkatsinnik. Aamma kisitsisit taakku saniatigut nalunaarutigineqanngitsunik aamma peqarnera eqqaamasariaqarparput. Nunaqarfiit avinngarusimasut pisoqarfioqaat, taakkunanilu kikkut tamarmik imminnut ilisarisimasuullutik, aviisimut Metroxpressimut taama oqarpoq.
