Nunatsinni pinerlussimasunut isertitsiviit sakkortuumik isornartorsiorneqarput
Tassa tamakku Folketingip Ombudsmandiata, Jørgen Steen Sørensenip paasisaasa ilagai, Nunatsinni isertitsiviit tallimat 2013-imi misissuiffigereerlugillu.
Ombudsmandip misissuifiigisaasa ilagaat, Tunumi nunaqarfimmi Kulusummi pinerlussimasunut isertitsivik. Taassuma saniatigut Nunatsinni isertitsiviit allat sisamat aamma misissuiffigineqarput. Ataaseq ulloq unnuarlu sulisoqartinneqartoq, allat pingasut ullup ilaanna sulisoqartinneqartut ataaserlu aalajangersimasumik sulisoqartinneqanngitsoq.
Nunaqarfimmi Kulusummi isertitsivimmi, Ombudsmandip takusani tunngavigalugit taanna apeqqusiivoq, Europami Inuit pisinnaatitaaffiisa pillugit isumaqatigiissut tassani malinneqarnersoq.
Pinerlussimasoq imaaliallaannaq ikiorneqarsinnaanngitsoq
Folketingip Ombudsmandiata allaffeqarfiani pisortaq, Morten Engberg Kulusummi takuniaasunut ilaavoq. Takusaallu imaannaanngitsuupput, ilaatigut paasineqarluni, pinerlussimasoq arlaannik pisariaqartitsiguni nunaqarfimmi kommunefogedimit imaaliallaannaq ikiorneqarsinnaanngitsoq.
- Kulusummi pissutsit allaanerussutigaat, isertitsivik ulloq unnuarlu sulisumit nakkutigineqarneq ajormat. Tassami nunaqarfimmi kommunefoged piffissaqarneq ajorpoq tamatigut isertitsivimmi nakkutiginninnissaminut, tassami taanna kommunefogediunermi saniatigut allamik suliffeqarpoq. Aamma isertitsivik kommunefogedip illuanut qanittumiinngilaq.
Inuup inuuneranik naleqarsinnaasoq
Morten Engbergip taamaattoqarnera ernumanartutut isigaa, tassa pinerlussimasumik isertitsivimmiittoqarnerata nalaani isertitsivik ikuallalissagaluarpat tamanna inuup inuuneranik naleqarsinnaasoq oqarluni.
- Isertitsivik ikuallattoqarnerani nilliasaateqaraluarpoq. Nilliasaalli kommunefogedip angerlarsimaffimminit tusaasinnaaneq ajorpaa. Isertitsivilli ikuallalissagaluarpat nunaqarfimmiunit isumaqatigiissutaagaluarpoq, takunneqaartoq erngerluni kommunefogedimut kalerriisassasoq. Tassalu tamanna Ombudsmandimit sakkortuumik apeqquserneqarpoq. Folketingip Ombudsmandiata allaffeqarfiani pisortaq, Morten Engberg taama oqarpoq.
Kulusummi Nunatsinnilu allani pinerlussimasunut isertitsivinni atugassarititaasut, allakkatigullu isornartorsiorneqartut qulequttat tallimaasut, 2015-imi aprilip aallaqqaataat nallertinnagu aaqqinneqarnissaat piumasaralugu, Folketingip Ombudsmandiata Nunatsinni Politimesteri piumasaqarfigalugu, decembarip 29-anni 2014-mi oqarasuaatikkut oqaloqatigaa.
Atugassarititat piaartumik pitsanngorsarneqassapput
Oqarasuaatikkut oqaloqatigiinnermi, isertitsivinniittut pitsaanerpaamik inuttut atugassarititaat Politimestereqarfimmit piaartumik pitsanngorsarneqarnissaat Ombudsmandip innersuussutigaa.
Kulusummi isertitsivik Folketingip Ombudsmandianit takuniarneqareerluni isornartorsiorneqartoq pillugu, Nunatta Politeeqarfianit iluarsartuunneqarpoq, oqarlutik isertitsivimmiittoqartillugu kommunefoged tamatigut tassani maanna paarsisalersoq.
- Pinerlussimasut tigusarineqarneranni taakku pitsaasumik atugassaqartinniartarpuvut. Soorunami ombudsmandip isornartorsiutai tusareerlutigit, pissutsit pitsaanerulersinneqarnissaat sulissutigisussaavagut, tassalu maanna taamaaliorluta.
Nunatta Politimestereqarfiani allaffissornikkut pisortaq, Claus Lyngholm Risbjerg oqarpoq, Kulusummilu isertitsivinniittut qanoq pineqartarnissaannik kommunfogedi maanna ilitsersorneqareersimalersoq aamma oqaatigalugu.
