Nunatsinni mittarfinni nutaanerpaaq ukiunik qulinngortorsiortoq
Paamiuni heliporti mittarfimmik 2007-imi taarserneqarpoq, mittarfik 799 meterisut takitigisoq decembarip aallaqqaataani 2007-imi atoqqaarfissiorneqarluni.
Ineqarnermut Attaveqaqatigiinnermullu taamanikkut naalakkersuisoq Kim Kielsen, naalakkersuisullu taamanikkut siulittaasuat Hans Enoksen, naalakkersuisullu allat marluk peqatigalugit Dash-7 siulleq tikilluaqquaat.
Paamiuni mittarfiup ukiunik qulinngortorsiornera assigiinngitsutigut malunnartinneqassaaq, tassami tallimanngorpat decembarip aallaqqaataani ualikkut nalunaaqutaq ataatsimiit sisamat tungaannut matu tamanut ammassapput.
Paamiuni mittarfik nunatsinni mittarfinni nutaanerpaavoq. Mittarfiimmi arfineq-marluk 1990-ikkuni sananeqalerneranni kingulliulluni naammassineqartuuvoq.