VIDEO Nunatsinni innuttaasut affaanit amerlanerit pujortartarput

Nunatsinni pujortartartut ikileriarsimagaluartut suli amerlapput, tamanna nunatsinni innuttaasut peqqissusaat pillugu 2014-imi misissuinermit inernerni erserpoq.

Allattoq Bikki P. Kleist

apriilip 01-at 2016 18:20

Ukiorpassuarni pujortatarsimasoq quersukujulluni peqqiilliortalerami nakorsamit pujortarunnaaqquneqarami aatsaat pujortarunnaarpoq.

- Nakorsiartariaqalersimavunga quersorpallaaqigama, qaammaterpassuit quersorama, Ingeborg Heinrich KNR-imut oqarpoq.

Ullormut cigarettit 20-t sinnerlugit pujortartarsimavai.

- Taamaalillunga kol-eqalernissannut (inuunerup sinnerani puallunneq, aaqq.) qanillisimavunga, Ingeborg Heinrich oqarpoq.

Aamma atuaruk Innuttaasut peqqissusaat pillugu nalunaarusiaq saqqummerpoq

Taamannak kalerrinneqarneq, nakorsamillu pujortarunnaarnissamut siunnersorneqarneq eqqarsalersitsisimavoq.

1993-imi pujortartartut 68%-iupput 2014-imilu ikileriarsimallutik pujortartartut 57%-inngorsimallutik.
Ukiut 21-t ingerlaneranni pujortartartut 11%-imik ikileriarsimallutik.

- Pujortanngisimaalaarama iluaallapallareerpunga.

Inuttullu iluatigineqarneq inuttut aamma isumalerujussuusoq Ingeborg Heinrich isumaqarpoq.

- Meeqqama piumaffigivaannga sakkortulaartumik, erligigaminnga, pujortaqqeqqunanga, tapersissussagaminnga aamma namminneq.

Aamma atuaruk Pujortartartut ikilisimagaluartut suli ajornartorsiuteqarpoq

- Inoorusukkunik, inuunertik erligigunikku cigaretti unitsittariaqarpaat, aalanerullutillu Ingeborg Heinrich KNR-imut oqarpoq.

Ingeborg Heinrichilu pujortartartuni kisiartaasimanngilaq mississuinerummi takutippaa nunatsinni innuttaasut affai sinnerlugit suli pujortartartut.

Naalakkersuisut suliniutaasa ilaat

Ukiorpassuarni pujortartarunnaarnissamut suliniuteqartoqarsimavoq, tamannalu iluatsippallaarsimanngilaq, peqqissutsimut naalakkersuisoq, Doris Jakobsen, tamanna qanoq iliuuseqarfiginiarpiuk?

- Ajuusaarnarpoq ullumikkut suli innuttaasut pujortartartut amerlasoorujussuummata. Tassa innuttaasut affai sinnerlugit suli cigarettimik atuisuupput.

- Taamaammat naalakkersuisuni assigiinngitsunik iliuuseqarpugut. Tassa siullermik pujortartarunnaarusuttut saaffiginnisinnaapput SMS-imut, peqqik.gl.-imut iseriarlutik, siunnersuutinik nassitsittarlutik akeqanngitsumik. Aamma taassuma saniatigut filmit pujortartarnermut tunngasut aamma takuneqarsinnaallutik peqqik.gl iluani, Doris Jakobsen oqarpoq.