Nunatsinni ilisimatusarnikkut paasisat pissarsiaqarfigilluartarpagut
Minnerunngitsumillu ilisimatoorpassuit nunanit allaneersut Nunatsinnut tikittartut Frederiksenip paasisaqarfigissallugit soqutigai. Ilisimatusarnermi paasisanit qanoq pissarsiaqartigisarnersugut nalornissutigaa tamakkiisumillu pissarsiaqarfigisarnerigut paaserusullugu.
Nivi Olsenip akissuteqaatimini erseqqissaatigaa ilisimatusarneq annertuumik pissarsiaqarfigineqartartoq, minnerunngitsumik peqqissutsimik ilisimatusarnermut tunngatillugu. Nakorsat peqqinnissaqarfimmi sulisut ukiut ingerlanerini peqqissutsimik ilisimatusarnerminni paasisanik nutaanik aqqutissiuussisimapput.
Inuuneqqortusisoqarneranik kinguneqartut
- Tamannalu innuttaasut peqqissusaannik ataatsimut isigalugu pitsaanerulersitsisimavoq, ilisimatusarnermut naalakkersuisoq taama allappoq.
Tamannalu Naatsorsueqqissaartarfiup kisitsisaatai naapertorlugit ukiut 30-it matuma siornamut naleqqiullugu agguaqatigiissillugu sivisunerusumik inuusoqartalerneranik kinguneqarpoq. Angutit ukiunik arfineq-pingasunik inuuneqqortusisimapput arnallu ukiunik arfinilinnik.
Nivi Olsenip ataatsimut inerniliilluni oqaatigaa, ilisimatuussutsikkut paasissutissat ilisimatuunit katersorneqartartut Nunatsinnit annertuumik pissarsiaqarfigineqartartut.