Nunatsinni eqqartuussiveqarnermi pissutsit oqallisigileraat
Tusarniaanissaq Folketingimut ilaasortap Inuit Ataqatigiinneersup Aaja Chemnitz Larsenip sulissuteqarneratigut pissaaq.
Nunatsinni eqqartuussiveqarnermi pissutsit pillugit nalunaarusiaq, Eqqartuussissuserisut peqatigiiffiata ukiaq saqqummersitaa ilaatigut aallaavigalugu taama pisoqartussanngorpoq. Nalunaarusiaq taanna pineqaatissinneqarsimasunut inissiisarfinni pissutsit eqqartuussiveqarnerullu iluani sulisut atugaasa pitsanngorsarnissaannut kaammattuutinik arlalinnik imaqarpoq.
- Politikerit annertuunik anguniagaqartuunissaat ukiorpassuillu siumut isigalugit eqqarsarnissaat pisariaqarpoq. Eqqartuussisoqarnermik pitsanngorsaanissaq piffissaq sivisooq atorlugu suliassaavoq, taamaattumillu siunissami inuiaat inatsisitigut illersugaanerisigut nukittorsaassagutta ullumikkut politikkikkut iliuuseqartariaqarpugut, Aaja Chemnitz Larsen taama oqarpoq.
Politikerip Inuit Ataqatigiinneersup tusarniaanermut atatillugu suliassat qanoq naammassineqarnissaannut siunnersuuteqarniarluni neriorsuutigaa.
